LIVE: Irani dërgon raketa në Rusi, reagon Ukraina - Arrestohet prifti që donte të mbante funeralin e Navalnyt, i dhanë një goditje në tru…

Ukraina thotë se nuk ka parë asnjë provë që sugjeron se Irani po furnizon Rusinë me qindra raketa balistike.

Kjo vjen pasi burime i thanë Reuters se Teherani i ka ofruar Moskës qindra raketa të fuqishme këtë vit.

Në përgjigje të raportit, zëdhënësi i Forcave Ajrore të Ukrainës, Yuriy Ihnat, i tha televizionit kombëtar: "Deri më tani, burimet tona zyrtare nuk kanë informacion për marrjen e raketave, veçanërisht një numër kaq të madh."

Zëdhënësja e Navalny, Kira Yarmysh ka deklaruar se forcat ruse kanë arrestuar priftin që donte të mbante një ceremoni përkujtimore për Alexei Navalny.

Përmes një mesazhi në rrjetet sociale, Yarmysh me nota sarkastike shkruan se i dhanë forcat e sigurisë një goditje “në tru” priftit, çka nënkupton shkakun e vdekjes së Navalnyt, një goditje me grusht në zemër sipas metodës sovjetike të përdorur nga shërbimi sekret i KGB-së.

“E mbani mend priftin që donte të mbante një ceremoni përkujtimore për Alexei Navalny?

Fillimisht e arrestuan, i dhanë një goditje (në tru) dhe tani forcat e sigurisë shkuan në shtëpinë e tij”- shkruan Yarmysh.

Irani i ka ofruar Rusisë qindra raketa gjatë këtj viti, kanë raportuar burime për Reuters.

Përafërsisht janë dorëzuar 400 raketa të ndara në katër dërgesa. Por njëkohësisht, burimet iraniane, kanë njoftuar se dërgime të tjera do të pasojnë gjatë javëve të ardhshme.

Ato përfshijnë armë balistike me rreze të shkurtër si Zolfaghar, një raketë e lëvizshme rrugore e aftë për të goditur objektivat në një distancë prej 185 deri në 435 milje.

“Do të ketë më shumë dërgesa. Nuk ka asnjë arsye për ta fshehur. Neve na lejohet të eksportojmë armë në çdo vend që dëshirojmë“, tha një zyrtar iranian.

Ministrja e Jashtme e Gjermanisë, Annalena Baerbock, tha të martën vonë se presidenti i Rusisë, Vladimir Putin, do të mbahet përgjegjës për luftë në Ukrainë dhe për pasojat globale që i ka shkaktuar ajo, gjatë samitit të grupit të 20 vendeve më të industrializuara – G20, këtë javë.

“Nëse Putini mendon se pas dy vjetëve bota do të harrojë se kush është përgjegjës për luftën në Ukrainë dhe pasojat e saj globale, e ka shumë gabim”, tha Baerbock të martën para se të nisej për takimin e ministrave të Jashtëm të G20-ës në Brazil.

“Ne nuk do të heqim dorë nga parimet themelore të Kombeve të Bashkuara dhe do ta mbështesim fuqishëm Ukrainën, sa të jetë e nevojshme dhe derisa populli i saj mund të jetojë në paqe dhe në liri përsëri”, shtoi ajo.

Rusia e nisi pushtimin e paprovokuar dhe të jashtëligjshëm të Ukrainës në shkurt të vitit 2022.

Ukraina, lufta në Rripin e Gazës dhe kërcënimi i zgjerimit të konfliktit në Lindjen e Mesme pritet të luajnë rol të rëndësishëm gjatë takimit të G20-ës.

Ministri i Jashtëm i Rusisë, Sergei Lavrov, pritet të marrë pjesë në takim në Rio de Zhaniero.

“Me humanizmin dhe përkushtimin tonë ndaj ligjit ndërkombëtar, ne i luftojmë kundër pamëshirëshmërisë së aktorëve, siç është Qeveria ruse”, theksoi ajo.

E tërë bota do të përfitojë “nëse të gjithë ne u përmbahemi rregullave për të cilat jemi pajtuar së bashku”, tha ajo.

G20 u themelua me besimin e “zgjidhjet e përbashkëta janë të mundura nëse ne qëndrojmë pranë njëri-tjetrit dhe i bashkojmë forcat”, nënvizoi Baerbock.

Udhëheqësi i Bjellorusisë, Alexander Lukashenko, ka thënë se ka shqetësime legjitime se një Luftë e Tretë Botërore mund të shpërthejë.

Bota “ka ardhur sërish në buzë të humnerës”, tha presidenti i aleatit më të ngushtë të Rusisë.

Por është marrëzi e plotë të mendosh se Rusia po përgatitet të sulmojë vendet baltike. shtoi ai.

“Tani ne jemi të mbuluar fjalë për fjalë me një valë informacioni të të ashtuquajturës parandjenjë të luftës së tretë botërore, të cilën një dembel ende nuk e ka përmendur. Dhe ka arsye për këto frikëra,” tha  Lukashenko.

“Do të doja ta karakterizoja fazën aktuale të konfrontimit qytetërues midis Lindjes dhe Perëndimit si më poshtë: maskat janë hequr plotësisht.”

Presidenti njoftoi se ushtria e tij kishte marrë një arsenal të ri armësh, duke përfshirë dy divizione raketore anti-ajrore dhe dy divizione të sistemeve raketore Iskander-M.

Së paku 45.123 ushtarë rusë janë vrarë prej se Moska e nisi pushtimin e Ukrainës para gati dy vjetëve, sipas një hulumtimi nga Mediazona dhe Shërbimi rus i BBC-së, të cilat i kanë identifikuar ushtarët e vdekur.

Dy e treta e të gjithë të vrarëve të konfirmuar – vullnetarë, rekrutë, ish të burgosur dhe luftëtarë nga kompanitë ushtarake private – nuk kishin lidhje me ushtrinë para se të niste pushtimi, ka gjetur hulumtimi.

Këtu përfshihen 5.406 ushtarë të mobilizuar, 80 për qind e të cilëve u vranë në vitin e dytë të luftës.

Krasnodar, Sverdolvsk, Bashkortostan dhe Çelabinsk janë rajonet me numrin më të madh të të vdekurve.

Gazetarët i kanë identifikuar 27.906 ushtarë rusë të vrarë vitin e kaluar – 57 për qind më shumë se humbjet e konfirmuara në vitin e parë të pushtimit.

Nga tetori i vitit të kaluar deri këtë muaj – kryesisht në periudhën gjatë të cilës forcat ruse u futën në qytetin industrial Avdivka dhe në zonat përreth në rajonin e Donjeckut – hulumtuesit e konfirmuan vdekjen e 6.614 ushtarëve rusë.

Avdivka ra javën e kaluar.

Gazetarët e bazuan hulumtimin e tyre në të dhëna nga burimet e hapura si, shpallje vdekjesh në gazeta, mesazhe në rrjetet sociale nga të afërmit e viktimave, raporte nga administratat lokale, si dhe të dhëna nga varrezat. Hulumtuesit thonë se numri i vërtetë mund të jetë së paku dy herë më i lartë.

Ministria e Mbrojtjes e Rusisë nuk i zbulon të dhënat për humbjet e ushtarëve dhe nuk komenton për shifrat e raportuar nga gazetarët.

Në janar, drejtori i CIA-s, Willam Burns, tha në një shkrim të publikuar në revistën Foreign Affairs se së paku 315.000 ushtarë rusë janë plagosur apo vrarë gjatë luftës në Ukrainë.

Aktivisti opozitar rus, Alexei Navanly, i cili javën e kaluar vdiq në rrethana ende të pasqaruara, dyshohet se është mbytur me një të goditur në zemër.

Siç raporton e përditshmja britanike The Sun, lideri opozitar rus paraprakisht ishte detyruar që të kalonte disa orë në temperatura ngrirëse, prej -27 gradësh.

Metoda brutale më parë “ishte shenjë veçuese e KGB-së”, sipas themeluesit të grupit të të drejtave të njeriut, Gulagu.

Kundërshtari më i madh i Vladimir Putinit vdiq të premten, derisa po e mbante dënimin 19-vjeçar me burg me akuzat për ekstremizëm.

Rusia ka pretenduar se avokati ka vdekur “nga sindroma e vdekjes së papritur”.

Më pas ka pasur dyshime që trupi i tij është gjetur i mbuluar me shenja mavijosjeje dhe zëdhënësja e tij, Kira Yarmysh pohoi se “ai është vrarë”.

Aktivisti i të drejtave të njeriut, Vladimir Osechkin ka thënë për The Times që shenjat e gjetura në trupin e Navalnyt kanë lidhshmëri me teknikën “një goditje” e cila në të kaluarën është mësuar nga forcat speciale operative të agjencisë qeveritare ruse KGB.

Bashkimi Evropian (BE) e ka miratuar të mërkurën pakon e 13-të të sanksioneve kundër Rusisë, njoftoi presidenca belge në rrjetin social X.

“Ambasadorët e BE-së sapo u pajtuan në parim për pakon e 13-të të sanksioneve në kornizën e agresionit të Rusisë kundër Ukrainës”, tha presidenca belge.

Kjo është njëra prej pakove “më të gjera” të sanksioneve të BE-së kundër Rusisë, sipas saj.

Gati 200 subjekte dhe individë janë futur në listën e sanksioneve me pakon e re.

Pakoja do të aprovohet formalisht në kohë për përvjetorin e dytë të fillimit të pushtimit të Ukrainës nga Rusia më 24 shkurt.

Kur Rusia kreu një seri lëshimesh sekrete satelitore ushtarake rreth kohës së pushtimit të saj në Ukrainë në fillim të vitit 2022, zyrtarët e inteligjencës amerikane filluan të hulumtojnë rreth misterit të asaj që saktësisht po bënin rusët. Më vonë, agjencitë e spiunazhit zbuluan se Rusia po punonte për një lloj të ri arme me bazë hapësinore që mund të kërcënonte mijëra satelitë që mbajnë botën të lidhur. Javët e fundit, një paralajmërim i ri ka qarkulluar nga agjencitë e spiunazhit të Amerikës: Një tjetër lëshim mund të jetë gati dhe pyetja është nëse Rusia planifikon ta përdorë atë për të vendosur një armë të vërtetë bërthamore në hapësirë, një shkelje e një traktati gjysmë shekulli të vjetër. Agjencitë janë të ndara në lidhje me gjasat që Presidenti Vladimir Putin të shkojë kaq larg, por megjithatë ky është një shqetësim urgjent për administratën Biden. Megjithatë në qarqet perëndimore kjo çështja është tanimë “tema e ditës”.

Skenari më i keq

Komandanti i komandës së hapësirës gjermane, gjeneralmajor Michael Traut, tha se një armë bërthamore ruse që shpërtheu në orbitë mund të shkatërrojë përgjithmonë "të mirën globale". Ai përshkroi po ashtu pasojat e skenarit më të keq. “Nëse dikush guxon të shpërthejë një armë bërthamore në atmosferën e lartë apo edhe në hapësirë, ky do të ishte pak a shumë fundi i përdorshmërisë së asaj të mire globale”, tha Trout, duke përshkruar pasojat shkatërruese të një shpërthimi bërthamor pa dallim në hapësirë që lëshon një puls elektromagnetik që djeg satelitët në të gjithë botën. “Askush nuk do t'i mbijetonte një veprimi të tillë, asnjë satelit, qoftë ai kinez, rus, amerikan apo evropian. Nëse do të llogariste në mënyrë racionale, askush nuk do të përdorte një armë të tillë në hapësirë”, shtoi ai. Pavarësisht nga inteligjenca e re amerikane se Rusia po zhvillon një lloj arme bërthamore kundër satelitit, këshilltari i Shtëpisë së Bardhë, John Kirby, mohoi se ekzistonte një kërcënim i afërt.

Pasoja katastrofike

Një ish-zyrtar i paidentifikuar i tha gazetës New York Times se "në këtë pikë, SHBA nuk ka aftësinë për të mbrojtur satelitët e saj kundër armëve të tilla". Ludwig Moller, drejtor i Institutit Evropian të Politikave Hapësinore, parashikoi pasoja ekonomike prej shumë trilionësh (10 12 ) në sektorët bankar dhe energjetik nëse Rusia shkatërron satelitët tregtarë. Ndërsa Kina dhe India po zhvillojnë gjithashtu me shpejtësi teknologjitë e tyre hapësinore, Rusia ka ndjekur kontrata ushtarake të hapësirës ajrore me shtetet e sanksionuara Iranin dhe Korenë e Veriut në mes të luftës në Ukrainë, shkruan Politico. Gjermania, Franca dhe Britania e Madhe kanë hapur komandat e tyre të mundshme hapësinore në vitet e fundit për të ndërtuar një mbrojtje të besueshme të qeverisë dhe infrastrukturës tregtare në orbitë. Ish-presidenti i SHBA Donald Trump nënshkroi Aktin e Autorizimit të Mbrojtjes Kombëtare në dhjetor 2019, duke krijuar Forcën Hapësinore të Shteteve të Bashkuara, shërbimi i parë i ri i armatosur që nga viti 1947.

Përgjigjja e Kremlinit

Kremlini i hodhi poshtë raportet si "akuza dashakeqe" dhe mashtrime nga Shtëpia e Bardhë për të detyruar ligjvënësit amerikanë të miratojnë më shumë para për të luftuar Moskës. Zëdhënësi i Kremlinit Dmitry Peskov tha se Shtëpia e Bardhë po përpiqet të inkurajojë Kongresin Amerikan që të votojë në favor të një projektligji për ndarjen e parave për Ukrainën. “Nuk mund ta komentoj fare këtë... Por është e qartë se Shtëpia e Bardhë po përpiqet të mashtrojë Kongresin për të votuar projektligjin e ndarjeve. Është e qartë. Do të shohim se çfarë trukesh do të përdorë Shtëpia e Bardhë”, tha ai. Për momentin, nuk ka ende informacione se sa afër është Rusia me lëshimin e armëve bërthamore në hapësirë. Arma është ende në zhvillim dhe ende jo në orbitë, kanë theksuar publikisht zyrtarët e administratës së Biden. Por nëse përdoret, thonë zyrtarët, do të ishte një "kalim i Rubikonit" i rrezikshëm në historinë e armëve bërthamore dhe mund të shkaktojë përçarje ekstreme në jetën e përditshme në mënyra që janë të vështira për t'u parashikuar.

Prokurori i Përgjithshëm i Ukrainës ka nisur një hetim mbi vrasjen e dyshuar të tre ushtarëve ukrainas në duart e trupave ruse. 

Tre të burgosurit ukrainas të luftës dyshohet se u qëlluan për vdekje të dielën pranë Robotyne, një fshat i rimarrë nga Kievi gjatë një kundërofensive ukrainase vitin e kaluar, shkruan Sky News.

Procedimi penal është ngritur për të hetuar “faktin e shkeljes së ligjeve dhe zakoneve të luftës, të kombinuara me vrasje me paramendim”.

Ky është rasti i dytë i tillë që hapet ditët e fundit pasi zyra e prokurorit tha të dielën se po hetonte të shtënat e supozuara fatale nga rusët ndaj gjashtë trupave të paarmatosur ukrainas pasi ata u tërhoqën nga Avdiivka.