Një i ri i prekur nga sindroma Down ka mbetur i vrarë nga policia në Stokholm, pasi kishte në dorë një armë lodër.
Policia ka hapur zjarr të enjten në mëngjes në kryeqytetin suedez ndaj Eric Torell, 20 vjeç, pasi ata e përshkruan ngjarjen si “situatë kërcënuese”.
Torell i cili u raportua i zhdukur pas largimit nga shtëpia përshkruhet nga e ëma e tij, Katarina Soderberg si njeriu më i mirë në botë.
“Është e pamundur të kuptohet, ai nuk do të dëmtonte një mizë”, tha Soderberg duke treguar se biri i saj edhe më herët ishte larguar nga shtëpia por gjithmonë ishte kthyer.
Incidenti ndodhi rreth orës 04:00 të kohës lokale në lagjen Vasastan të Stokholmit, pasi policia iu përgjigj raporteve për një person me armë në dorë. Ata njoftuan se pavarësisht urdhërimeve për hedhjen e armës që ata besonin se është e rrezikshme, 20 vjeçari nuk u pajtua dhe u qëllua.
Një hetim për sjelljen e mundshme të Policisë tashmë ka filluar dhe është në proces raportojnë mediat suedeze.