Është zbuluar se asnjë anëtar i komunitetit me ngjyrë nuk është pranuar si anëtar i bordit që është përgjegjës për lirimin e kushtëzuar të personave të caktuar nga burgu. Sidoqoftë, shefja e këtij bordi, Caroline Corby, tha se prapa këtij lëshimi mund të qëndrojë një vlerësim i pavetëdijshëm dhe i paqëllimshëm, ndonëse bie në sy edhe prania e vogël e komuniteteve tjera pakicë, përpos zezakëve.
Ajo deklaroi se ndihet e shqetësuar për mungesën e diversitetit në bord, i cili përbëhet nga 240 anëtarë, 13 prej të cilëve i takojnë komunitetit aziatik ose grupeve tjera të pakicave. “Për momentin nuk kemi zezakë në bord dhe kjo paraqet një shqetësim jo të vogël për mua”, tha ajo për “BBC”-në. “Sidoqoftë, ne jemi shumë të interesuar që të kemi sa më shumë aplikues nga ky komunitet”, shtoi ajo.
Zonja Corbi u arsyetua edhe me numrin e vogël të aplikuesve. Eliminimi i tyre nga gara, sipas saj, ndodhi për shkak të rezultateve të dobëta gjatë dy fazave të para të një procesi vlerësuar që përbëhet nga pesë të tilla, ndonëse nuk dihen arsyet e këtyre rezultateve. “Ne kemi marrë mësim nga rundi i kaluar i rekrutimit sepse vërtet kemi pasur për objektiv që ta ndryshojmë këtë gjendje, por dështuam për ta arritur atë, prandaj jam e vendosur që e njëjta të mos na përsëritet më”, tha ajo.
Çështja e racizmit në Britani të Madhe është një çështje mjaft e ndërlikuar për shkak të rasteve ku njerëzit me ngjyrë nuk përfaqësohen në mënyrë të barabartë në institucione. Ata shpesh janë edhe objekt i paragjykimeve të ndryshme shoqërore, ndonëse legjislacioni i vendit garanton të drejta të barabarta pavarësisht përkatësisë racore, shkruan “The Guardian”.
