Dita e parë e testeve dimërore ishte pozitive për pilotin spanjoll Fernando Alonso, që në pistën e Montmelo u rendit i pesti, një rezultat i mirë për të dhe makinën McLaren. “Mendoj se më në fund kanë ardhur momentet e bukura për McLaren. Edhe kur kemi zhgënjyer, motivimi ka qenë i madh. Por tani jemi vërtet të shpejtë dhe mund të synojmë shumë më tepër në sezonin e ri”, tha Alonso, 2 herë kampion bote në Formula 1. “Po bëjmë testimet e para, si të gjithë, por gjërat duken mirë dhe motori Renault është më i fuqishëm se Honda që kishim vjet. Unë shpresoj që deri sa të nisë gara e parë, të kemi bërë shumë kilometra në pistë, duke marrë shumë informacion dhe sistemuar makinën e re”, tha ai.
