Cristiano Ronaldo ka diskutuar në lidhje me raportin e tij me Lionel Messin, pas triumfit të Juventusit (3-0) ndaj Barcelonës në Camp Nou të martën mbrëma.
Superylli i Zonjës së Vjetër shënoi dy herë në sfidën e vlefshme për fazën grupore të Ligës së Kampionëve, ndërsa Bianconerët përfunduan të parët në Grupin G.
Portugezi ka thënë pas ndeshjes se asnjëherë nuk e kishte konsideruar argjentinasin si një rival në mënyrën si është interpretuar nga tifozët dhe mediat.
“Gjithmonë kam pasur një raport të përzemërt me të. I kam ndarë 12, 13 apo 14 vite të ceremonive me të. Asnjëherë nuk e kam parë si një rival”.
“Ai gjithmonë përpiqet të bëjë më të mirën për ekipin e tij dhe unë po ashtu. Gjithmonë ia kemi kaluar mirë”.
“Por, e dimë se në futboll, për mediat, për spektaklin, kërkohet rivaliteti, mirëpo gjithmonë kemi kaluar mirë. Unë e konsideroj njësoj si gjithmonë”, ka deklaruar Ronaldo për Movistar+.
