Felix Magath e mban mend si të ishte dje. Ish-trajneri gjerman ishte një nga “fajtorët” kryesorë, që Raúl González vendosi ta përfundojë kohën e tij te Real Madridi në 2010 për t’u bashkuar me Schalke 04. 11 vjet më vonë, Magath kujtoi negociatat e njërit prej ish-nënshkrimeve më spektakolare në Bundesligë. Ai nuk ka dyshim se legjenda e Real Madridit, në një të ardhme jo shumë të largët do të përfundojë duke stërvitur klubin e jetës së tij.
Gjithçka filloi kur Christoph Metzelder, një tjetër ish-madridas, që u bashkua me “minatorët” po atë verë, e pyeti Magath nëse kishte nevojë për një sulmues dhe i propozoi Raul. “A je çmendur?” – iu përgjigj Magath. Ai mendoi se ishte një shaka, siç kujton tani. “E pyeta Metzelder nëse i mungonte ndonjë vidë, nëse ishte çmendur. Thjesht mendova: Raúl?! Çfarë po më thua”, – shpjegoi ish-trajneri, i cili aktualisht është këshilltar i klubit.
Por Metzelder insistoi dhe i tha atij: “Kam folur me Raul dhe do ta telefonoj për ta pyetur mbi këtë mundësi”. Pastaj, Magath u ndal për të menduar: “Çfarë do të bëjë Raúl? Ai nuk luan më për Real Madridin dhe nuk do të jetë në gjendje të ndryshojë skuadër në Spanjë. Mbase e josh Anglia? Si sulmues në Angli, atje do t’ia kishin thyer këmbët. Futbolli italian ishte shumë mbrojtës, edhe atje do të kishte problemet e tij”.
Prandaj, Magath filloi ta besonte atë mundësi dhe ra në kontakt me Raul. Sigurisht, jo gjithçka ishte një përrallë, kur operacioni u mbyll dhe Raúl ndryshoi “Bernabéu” për “Gelsenkirchen”. “Kur po stërvitej për herë të parë me ne, i thashë vetes: O Zot, çfarë ke bërë, trap! A je budalla? Ai nuk ishte në gjendje shumë të mirë fizike. Por, si profesionist ishte i jashtëzakonshëm. Teknikisht ishte i jashtëzakonshëm dhe vullneti për t’u stërvitur gjithnjë shembullor. Si person dhe si personalitet, ai ishte i jashtëzakonshëm”, – kujton Magath.
Kur u pyet për të ardhmen e legjendës së Real Madridit, ish-trajneri i tij gjerman nuk kishte dyshime: “Nuk kisha takuar dikë si ai më parë. Unë kam respektin më të madh për të si lojtar dhe si person. Për këtë arsye, jam i bindur që do ta shohim atë si trajner te Real Madridi në një të ardhme jo shumë të largët”.
