Trajneri i Gjilanit, Ismet Munishi, beson se fitorja 1:0 kundër Dritës në derbin kryesor në Superligë dëshmon se Gjilani është skuadër kampione dhe se meriton të respektohet.
Albert Dabiqaj e shënoi golin e vetëm dhe vendimtar në fillim të pjesës së dytë në Stadiumin e Qytetit në Gjilan për tri pikët e plota të kuqebardhëve ndaj rivalit direkt për titull.
Duke folur pas ndeshjes, Munishi tha: “Fitoren ia kushtoj tifozëve. Ne kemi treguar fuqi të madhe këtë kampionat. Të them të drejtën e meriton klubi i Gjilanit, jemi klubin i organizuar shumë mirë dhe meritojmë respekt. Kjo është skuadra kampione, kështu luftohet me këtë qasje me këtë lojë, sot kemi pas përballë skuadër shumë të fortë.”
“Unë i përshtatem edhe Barcelonës, kur e kam skuadrën e mirë i shënoj edhe pesë gola. Sot kundërshtari na respektoi dhe vendosëm t’ia japim vetëm një gol.”
Ai shtoi: “Këtij ekipi i mungon vetëm një futbollist apo dy për ta rritur konkurrencën dhe i duhet një fazë përgatitore… por edhe kështu po ia dalim sepse kemi individë të fortë.”
Fitorja nënkupton se Gjilani tani mbledh 28 pikë nga 15 ndeshje dhe vijon të jetë lider i Superligës.
