Sulmuesi i Borussia Dortmund, Sebastian Haller ka marrë një lajm shumë të keq së fundmi teksa është diagnostifikuar me kancer në testikuj. Ish-lojtari i Ajax, nisi të kishte shqetësime gjatë stërvitjes të së hënës me verdhezinjtë, ndërsa analizat më pas përcaktuan edhe shkakun e tyre.
Tashmë, Haller ka nisur menjëherë kurimin ndërsa ka reaguar me anë të një mesazhi në rrjetet sociale ku thekson se do të rikthehet edhe më i fortë.
“Dua t’i falenderoj të gjithë nga thellësia e zemrës për këto mesazhe kaq të ngrohta. Më kanë prekur shumë fjalët e fansave dhe ndjehem sikur nuk e meritoj të gjithë këtë vëmendje nga ta.
Por, falë atyre e di se do të më duhet tashmë të kaloj edhe një test tjetër. Shihemi së shpejti në fushë për të festuar triumfin e radhës. Ju falenderoj unë dhe familja ime, tani do të përqëndrohem te rikuperimi për t’u rikthyer edhe më i fortë”, u shpreh Haller.
