Një lajm i rëndësishëm vjen nga Brukseli në lidhje me çështjen e flaktë të Superligës Evropiane, pas padisë së kësaj të fundit kundër UEFA-s dhe FIFA-s, të akuzuara për monopol të pretenduar sportiv në organizimin e garave ndërkombëtare.
Të enjten, më 15 dhjetor, Avokati i Përgjithshëm i Gjykatës Evropiane të Drejtësisë, Athanasios Rantos, shprehu mendimin e tij për këtë çështje: “Rregullat e FIFA-s dhe UEFA-s, të cilat i nënshtrohen autorizimit paraprak, janë në përputhje me ligjin e BE-së për konkurrencën”.
Fjalë të cilat në fakt konfirmojnë sesi, sipas Gjykatës Evropiane të Drejtësisë, menaxhimi i futbollit nga UEFA nuk konsiderohet monopol, por përkundrazi respekton standardet dhe kufizimet e vendosura nga ligji i konkurrencës i Unionit.
Konkluzioni i paraqitur sot nga Avokati i Përgjithshëm i Gjykatës së BE-së, qëndrimi zyrtar i të cilit megjithatë nuk duhet të konsiderohet i detyrueshëm për gjyqin e planifikuar në mars 2023, paraqet një pasazh domethënës që komplikon ndjeshëm pozicionin e projektit të Superligës.
Më poshtë është njoftimi zyrtar për shtyp i Gjykatës së Drejtësisë së Bashkimit Evropian: “Në opinionin e tij të paraqitur sot, Avokati i Përgjithshëm Athanasios Rantos propozon që gjykata të përgjigjet se:
1. Rregullat e FIFA-s dhe UEFA-s që bëjnë çdo kompeticion të ri, subjekt i autorizimit paraprak, janë në përputhje me ligjin e BE-së për konkurrencën. Duke marrë parasysh karakteristikat e garës, efektet kufizuese që rrjedhin nga sistemi janë të qenësishme dhe proporcionale për të arritur objektivat legjitime që lidhen me specifikën e sportit, që ndjekin UEFA dhe FIFA;
2. Rregullat e konkurrencës së Unionit nuk e pengojnë FIFA-n, UEFA-n, shoqatat e tyre kombëtare ose ligat që të kërcënojnë me sanksione kundër klubeve të lidhura me këto shoqata nëse marrin pjesë në një projekt për të krijuar një kompeticion të ri, i cili do të rrezikonte të cenonte objektivat legjitime të ndjekura nga ato federate, të të cilave ata janë anëtarë;
3. Rregullat e konkurrencës së Unionit nuk përjashtojnë kufizimet në statutet e FIFA-s në lidhje me marketingun ekskluziv të të drejtave, në lidhje me garat e organizuara nga FIFA dhe UEFA për aq sa këto kufizime janë të qenësishme dhe proporcionale me ndjekjen e objektivave legjitime, që lidhen me natyrën specifike të sportit;
4. Ligji i Unionit nuk përjashton statutet e FIFA-s dhe UEFA-s, të cilat parashikojnë që krijimi i një gare të re pan-evropiane të futbollit për klube i nënshtrohet një sistemi paraprak autorizimi, për aq sa një kërkesë e tillë është e përshtatshme dhe e nevojshme për këtë qëllim, duke marrë parasysh veçoritë e konkurrencës së parashikuar”.
Rreth Superligës:
“Superliga evropiane është e lirë të krijojë kompeticionet e saj të pavarura të futbollit jashtë ekosistemit të UEFA-s dhe FIFA-s. Megjithatë, ajo nuk mund, në të njëjtën kohë me themelimin e një gare të tillë, të vazhdojë të marrë pjesë në garat e futbollit të organizuara nga FIFA dhe UEFA pa autorizimin paraprak të këtyre të fundit.
Mungesa e njohjes nga FIFA dhe UEFA e një gare thelbësisht të mbyllur siç është Superliga është në përputhje me ndjekjen e parimeve legjitime si ai i pjesëmarrjes bazuar në rezultate sportive. Pozicioni aktual dominues i UEFA-s në fakt e vendos atë nën një përgjegjësi të veçantë: kur shqyrtohen aplikacionet për autorizimin e garave të reja, kërkohet të sigurohet që klubet e tjera të mos privohen padrejtësisht nga qasja në treg”.
