Silvinjo po vijon punën e tij me evidentimin e talenteve të futbollit shqiptar, që mund të jenë elementë potencialë për Kombëtaren.
Trajneri i kuqezinjve ka ndjekur disa ndeshje të “Abissnet Superiore”-s, ndërsa ditën e djeshme ishte i pranishëm në stadium për të parë nga afër përballjen mes Laçit dhe Egnatias.
Silvinjo gjendej në shoqërinë e Doribës dhe Bulkut.
Andi Lila ka zbuluar edhe emrin që po ndjek me kujdes trajneri brazilian.
“Në dijeninë time, Silvinjo e ka ndjekur me kujdes Redi Kasën”, ka thënë ish-lojtari kavajas.
Silvinjo ka qenë i pranishëm në stadium në dy ndeshjet e fundit të Egnatias, atë kundër Laçit ditën e djeshme dhe në atë përballë Tiranës, në të cilën Kasa shënoi golin e vetëm për rrogozhinasit.
Redi Kasa është një nga emrat që po spikat së tepërmi këtë sezon në “Abissnet Superiore”. 22-vjeçari është një prodhim i akademisë së Parmës, ndërsa më tej ka vijuar karrierën profesioniste në elitën e futbollit bullgar.
Lojtari shqiptar ishte pjesë e Septemvri Sofias deri në muajin dhjetor, ndërsa në merkaton e dimrit u bë pjesë e Egnatias në Shqipëri. Deri më tani Kasa numëron 4 gola të shënuar me ekipin nga Rrogozhina.
