Portieri i Bashkimit, Luka Stojkovski, ka qenë njëri nga heronjtë e derbit të djeshëm për skuadrën e tij në fitoren 1-0 kundër BvK-së.
“Gardiani” i talentuar kumanovar arriti të mbante të paprekur portën me gjithë ato raste të krijuara nga mysafirët.
“Mendoj se e fituam me meritë derbin me BVK-në.
Punuam shumë gjatë gjithë javës dhe ishim të pozicionuar mirë taktikisht për ndeshjen.
E shijova këtë derbi para 3.000 shikuesve dhe tifozëve tanë ‘Ilirët’ që na dhanë mbështetje të madhe për të fituar derbin”, deklaroi në fillim Luka, duke vazhduar:
“Hymë në ndeshje të motivuar dhe dhamë maksimumin për të marrë tre pikët. Këtë e treguam të gjithë kur e morëm kartonin e kuq në minutën e 10-të.
Në atë moment BVK-ja na kërcënoi me disa goditje, gjë që ishte një pengesë e lehtë për mua për t’i mbrojtur gjuajtjet”.
Luka zbulon se cka i kanë thënë trajnerët para fillimit të ndeshjes.
“Para ndeshjes me BVK-në më erdhën kryetrajneri dhe trajneri i portierëve dhe më thanë që sot do të bëhem HERO, gjë që më dha motiv edhe më të madh për të shpëtuar rrjetën.
I falënderoj fansat tanë që erdhën në numër të madh për të na mbështetur, duke krijuar një atmosferë të mrekullueshme. Ishte kjo hera e dytë që unë mbroj para një publiku kaq të madh”, thekson Stojkovski.
Ai thotë se ka ardhur te Bashkimi për të ndihmuar skuadrën në arritjen e qëllimit.
“Unë erdha në Bashkim për ta ndihmuar që të kthehet atje ku e ka vendin-që është Liga e Dytë.
Kemi edhe një finale të madhe për të fituar dhe ajo është barazhi”.