E mërkura e 17 majit nuk është një ditë e zakonshme.
Është dita kur do të luhet java e 33-të e kampionatit ‘Abissnet Superiore’, është dita e derbit të kryeqytetit ‘Tirana – Partizani’.
Edhe tre javë kanë mbetur nga fundi i këtij edicioni, që ka prodhuar pa dyshimin më të vogël shumë emocione, spektakël, garë të fortë, ndeshje të paparashikuara, surpriza të shumta.
E megjithatë, për të mos shkuar te fundi i sezonit, pasi ka ende edhe tre javë pas të nesërmes për t’u luajtur futboll.
Të mërkurën luhen pesë ndeshjet e javës së 33-të, katër prej të cilave në të njëjtin orar, në ora 15:00, ndërsa kryesfida e javës, Tirana – Partizani është planifikuar të luhet në ora 18:30 në stadiumin ‘Air Albania’.
Interesi për të parë nga afër derbin shqiptar është i madh dhe kjo është vërejtur edhe nga biletat e shitura deri më tani.
Tifozët e të dyja skuadrave, por edhe futbolldashësit shqiptarë, duket se duan të kalojnë një pasdite ndryshe në stadiumin ‘Air Albania’. Tirana – Partizani është një ndeshje deri diku vendimtare për të dyja ekipet për këtë sezon futbollistik.
Bardheblutë e drejtuar nga Orges Shehi duan të mbajnë vendin e parë në klasifikim dhe të ëndërrojnë për titullin e dytë kampion radhazi, ndërsa për Partizanin e drejtuar nga Giovanni Collella, fitorja është obligim për të marrë vendin e parë e më pas për të luftuar deri në fund të kampionatit për të ngritur titullin kampion.
Gjithçka do të vendoset nesër, me kryesfidën që do të luhet në ora 18:30 në stadiumin kombëtar ‘Air Albania’.
Në ndeshjet e tjera të kësaj jave, Vllaznia do të përballet me Teutën.
Ndeshja do të luhet në shtëpinë e shkodranëve, në stadiumin ‘Loro Boriçi’. Të dyja skuadrat kanë vetëm një synim: të marrin tre pikët.
Barazimi nuk vlen shumë në këtë pikë të kampionatit, pasi vendi i katërt në klasifikim ‘të dërgon në Europë’. Ky takim është planifikuar të nisë në ora 15:00.
Në po të njëjtën orë, Kukësi i Rrahman Hallaçit do të presë në shtëpinë e tij ‘Kukësi Arena’ ekipin e Laçit.
Një takim që pritet të jetë mjaft i luftuar nga të dyja skuadrat, ku Kukësi kërkon të pozicionohet sipër vendit të 8-të dhe t’i largohet zonës së play-out-it, ndërsa Laçi kërkon të mbajë vendin e katërt në kampionat.
Bylis synon mbijetesën dhe kërkon qëndrimin në kampionatin ‘Abissnet Superiore’ edhe për edicionin e ardhshëm.
E po kështu, edhe Erzeni i Shijakut. Në stadiumin ‘Niko Dovana’ do të luhet sfida Erzeni – Bylis, një takim i vështirë për të dyja ekipet. Ndeshja është planifikuar të zhvillohet në ora 15:00.
Egnatia do të udhëtojë drejt Kamzës ditën e nesërme ku do të luajë kundër Kastriotit të vendit të fundit. Krutanëve u bën punë vetëm fitorja dhe tre pikët, ashtu sikurse edhe Egantias, që do të blindojë vendin e tretë dhe ‘Europën’. Ndeshja do të luhet në stadiumin e Kamzës në ora 15:00.
Ndeshjet e javës së 33-të, ‘Abissnet Superiore’
Kukësi – KF Laçi, ora 15:00, 17.05.2023
KF Erzeni – KF Bylis, ora 15:00, 17.05.2023
KF Vllaznia – KF Teuta, ora 15:00, 17.05.2023
KS Kastrioti – KF Egnatia, ora 15:00, 17.05.2023
KF Tirana – KF Partizani, ora 18:30, 17.05.2023
