Për Federico Bernardeschi, si nga pikëpamja personale, ashtu edhe kolektive, gjërat nuk po shkojnë shumë mirë. Toronto lundron në ujërat e këqija të MLS; zë vendin e parafundit në Konferencën Lindore, me një pikë më shumë, por edhe dy ndeshje më shumë se Inter Miami i Leo Messit, i cili mbyll klasifikimin.
Bernardeschi foli për situatën shumë të mprehtë të Leonardo Bonuccit, ish-shokut të tij të skuadrës te Juventusi dhe gjithashtu në ekipin kombëtar, i kompletuar me një triumf të përbashkët në Kampionatin Evropian të vitit 2021:
“Fola me të dhe i tregova se sa keq më vjen për situatën që po përjeton. Ai e meritonte të largohej ndryshe, sepse është simbol i Juventusit”.
Mbyllja me Romelu Lukakun, i cili mund të bëhet trashëgimtari i Vlahovic te Juventusi. Çfarë ndjesie do të shkaktonte te Bernardeschi pamja e belgut me fanellën bardhezi?
“Nuk do të habitesha, sepse futbolli i sotëm është biznes dhe do të jetë gjithnjë e më shumë i tillë”, – përgjigjet mesfushori italian.
