Trajneri i Prishtinës, Debatik Curri është ndarë i kënaqur me fitoren e arritur përballë Malishevës, fitore e cila i dërgon në krye të tabelës në kampionat.
Prishtina ka fituar me rezultat 3-1 ndaj Malishevës në ndeshjen e vlefshme për javën e tretë të Albi Mall Superligës falë golave nga Leutrim Kryeziu, Drilon Islami dhe Hasan Hyseni.
Kjo fitore ka lënë shije të mirë te trajneri i vendasve, Curri, i cili ka vlerësuar ekipin pas atij barazimi befasues ndaj Gjilanit javën e kaluar.
“E vetmja pjesë që nuk më pëlqeu në ndeshje ishte momenti kur pësuam golin.
Nuk duhet ta mendojmë se në cilën minutë apo kohë jemi duke luajtur.
Ajo pjesë ma zbehu fitoren paksa, megjithatë luajtëm mirë dhe arritëm t’i fitojmë pikët e plota pas atij barazimi dëshpërues ndaj Gjilanit”, ka thënë fillimisht Curri.
“Malisheva mendoj se ka një skuadër shumë të mirë.
Por, ne i kemi kryer detyrat tona dhe arritëm ta fitojmë këtë ndeshje me meritë”.
“Ka qenë e vështirë t’i motivoj lojtarët pas barazimit ndaj Gjilanit, por jam i kënaqur me fitoren.
Fitorja u arrit falë angazhimit të lojtarëve, të cilëve ua uroj këtë fitore”, përfundoi trajneri i Prishtinës.
Pas kësaj fitore, Prishtina bëhet lidere e kampionatit me shtatë pikë, ndërsa ndeshjen e ardhshme luan në udhëtim te Llapi.
