Juventus luan të dielën në transfertë ndaj Salernitanës me bardhezinjtë që synojnë fitoren e radhës në kampionat për të qëndruar pranë Interit kryesues.
Edhe pse në konferencën për shtyp, trajneri i Zonjës së Vjetër, Massimiliano Allegri theksoi sërish se objektivi i ekipit të tij është vendi i katërt për t’u rikthyer në Champions League sezonin e ardhshëm.
“Ndeshja në Salerno është e komplikuar, ata fituan ndaj Veronës dhe kanë ende shpresa për mbijetesën në elitë. Duhet ta mbyllim në mënyrë pozitive këtë pjesë të parë të sezonit dhe të ruajmë avantazhin që kemi ndaj skuadrës që renditet në vendin e pestë për t’u kualifikuar në Champions League.
Nuk duhet ta ulim vëmendjen sepse në futboll nuk i dihet kurrë.
Kush e nis titullar Chiesa apo Yildiz? Për mua është i rëndësishëm si ai që luan titullar, edhe ai që vjen nga stoli. Yildiz është një sulmues i dytë, një lojtar teknik me shumë gola në këmbë.
Ka vendin e tij në fushë dhe nuk e shoh si një mesfushor. Për mua nuk ka rëndësi titullar apo jo, stoli është shumë i rëndësishëm gjatë ndeshjes, sidomos si për lojën që mund të zhvillohet ndaj Salernitanës”, u shpreh Allegri.
Ndeshjen mes Salernitanës dhe Juventus mund ta ndiqni të dielën duke nisur nga ora 18:00.
