Futbollisti nga Kosova, Donis Avdijaj, bëri lojë të madhe në fanellën e Roda-s, duke i siguruar tri pikë të mëdha dhe i shtuan shpresat për mbijetesë në Kampionatin e Holandës. Avdijaj luajti standard, ndërsa në minutën e 37-të, nga rreth 12-13 me goditje fantastike tundi portën e vendasve dhe i siguroi fitoren Roda-s me rezultat 1:0 kundër NAC Breda-s. Futbollisti shqiptar u ndëshkua me karton të verdhë në minutën e 21-të, kurse u zëvendësua në atë të 70-tën. Roda u kthye me tri pikë që nuk maten as me ari, e cila mban vendin e parafundit (i 17-ti) me 20 pikë, kurse NAC Breda është i 15-ti me 7 pikë më shumë.