Barcelona ka ruajtur ecurinë pa humbje në La Liga por gjithsesi nuk ka arritur të fitojë ndeshjen jashtë fushe ndaj Celta Vigo në Estadio de Balaidos. Ishte një ndeshje që i kishte të gjitha por në fillim të gjithë mbetën të habitur nga formacioni i Valverde-s i cili kishte lënë në stol emra si Messi, Busquets, Pique dhe Alba sikur të ishte një ndeshje kupe ndaj një skuadre inferiore.
Kjo ishte hera e parë pas 16 vitesh që Barcelona nuk kishte në fushë asnjë lojtar të dalë nga akademia La Masia. Por Celta nuk është e tillë dhe i shkaktoi jo pak probleme katalanasve të cilët gjithsesi gjejnë golin e avantazhit me Dembele në minutën e 36’. Por pak përpara se lojtarët të riktheheshin në dhomat e zhveshjes Jonny barazon rezultatin duke prishur planet e Barça-s. Pas pushimit Valverde nuk kërkon të rrezikojë dhe fut në fushë Messi-n bashkë me Roberto dhe menjëherë vjen goli i avantazhit nga Paco Alcacer.
Situata vështirësohet për Barcelona-n kur i porsa-futuri Roberto del me karton të kuq pasi tërhoqi nga fanella kundërshtarin që po shkonte drejt portës së ter Stegen. Dhe në minutën e 82’ Vigo shfrytëzon superioritetin numerik duke shënuar golin e barazimit falë Iago Aspas që duket se ka shtyrë topin me dorë drejt portës. Minutat e fundit ishin të mbushura me emocione por rezultati mbeti i pandryshuar.