Real Madrid shpreson të marrë sulmuesin e Manchester United, Marcus Rashford për të zëvendësuar Gareth Bale, sipas asaj që bën të ditur shtypi spanjoll dhe ai anglez.
“Don Balon” dhe “Daily Star” shkruajnë se Florentino Perez e ka pëlqyer futbollistin e kombëtares angleze, që kur ai “shpërtheu” në “Old Trafford”.
“Los Blancos” kërkojnë të ndërtojnë një sulm të ri në sezonin e ardhshëm dhe krahas Cristiano Ronaldo dhe Marco Asensio ata duan të marrin edhe Rashford që të mbeten pretendentë në La Liga dhe Champions League.
Vetë Manchester United është i detyruar të marrë në konsideratë shitjen e Rashford, pasi futbollisti nuk është i kënaqur me mundësitë që i ka dhënë Mourinho.
Anglezi ka luajtur 14 herë nga minuta e parë dhe 16 herë si zëvendësues në këtë sezon, por që në momentin kur ka ardhur Alexis Sanchez nga Arsenal minutat e tij janë zvogëluar ndjeshëm dhe Real Madrid do të ishte një rilindje për të.
