Jose Mourinho ka përshëndetur Arsene Wenger, pasi trajneri i Arsenalit njoftoi se do të largohet nga klubi këtë verë. Portugezi i ka kërkuar francezit të qëndrojë në lojën e futbollit. Ky duet trajnerësh janë përplasur vazhdimisht, gjatë gjithë karrierës së tyre, por Mourinho thotë se gjithmonë ka pasur respekt për Wenger, duke këmbëngulur se përplasjet kanë ardhur si rezultat i admirimit të ndërsjellë për njëri-tjetrin.
Në të vërtetë, Mourinho ka rezervuar disa prej shakave të tij më të egra për francezin, duke e quajtur atë një “soditës” dhe një “specialist në dështim”. Megjithatë, ai ka lëshuar një deklaratë të gjatë për të ardhmen e Wengerit, duke këmbëngulur se ruan nderim të lartë për francezin, me të cilin do të ndeshet për herë të fundit, kur Arsenali të vizitojë “Old Trafford”, në fund të prillit.
“Nëse ai është i lumtur, edhe unë jam i lumtur; nëse është i trishtuar, jam edhe unë i trishtuar. Gjithmonë dëshiroj më të mirën për kundërshtarët e mi. Gjithmonë uroj më të mirën. Nëse ai është i kënaqur me vendimin që ka marrë dhe duket përpara kapitullit të ardhshëm të karrierës dhe jetës së tij, jam shumë i lumtur për të.
Z.Wenger dhe Arsenali ishin për shumë vite rivalët më të mëdhenj të epokës së Sir Alex. Jam shumë i sigurtë se ne si klub do t’i tregojmë Wengerit respektin që meriton”, – tha Mourinho për gazetarët. Kur u pyet për një keqardhje të mundshme, që Mourinho mund të ketë në lidhje me sjelljen e tij ndaj Wenger, ai shtoi:
“Nuk është për keqardhje, unë mendoj se pyetja juaj është një pyetje tipike, nga dikush që nuk ishte në këtë anë, nuk ka qenë trajner dhe lojtar, që nuk e njeh mënyrën se si e respektojmë njëri-tjetrin, edhe kur nganjëherë nuk duket sikur nuk e bëjmë. Lojtarët marrin kartonë të verdhë dhe të kuq nga veprimet agresive kundër njëri-tjetrit në fushë, shkëmbejnë fjalë të këqija gjatë karrierës. Edhe trajneri është i njëjtë, por në finale të gjithë e respektojmë njëri-tjetrin. Më shumë ato janë probleme që mbeten brenda fushës së blertë”.
Në lidhje me atë që ka arritur trajneri francez në “Emirates”, Mourinho shton: “Unë e di se çfarë do të thotë të fitosh tre tituj në Premier League dhe shtatë “FA Cup”, atë që ai bëri në Japoni dhe Francë, atë që solli në futbollin francez dhe atë që ai i dha Arsenalit në periudhën pa Premier League, kalimi nga stadiumi në stadium, ne e dimë atë që ai bëri. Nëse ai është i lumtur me vendimin, unë jam shumë i lumtur dhe shpresoj se nuk do të tërhiqet nga futbolli”.
