Sulmuesi i Chelsea-t Eden Hazard shprehet se ai nuk mund ta fitojë Topin e Artë pasi nuk është aq egoist sa duhet.
Çmimi individual më i madh që ka fituar lojtari i përfaqësueses belge është ai i Lojtarit të Vitit në Premier League, të cilin e mori pas sezonit 2014/15 ku fitoi edhe titullin kampion me Chelsea-n.
Hazard, i cili e mbylli sezonin me 12 gola dhe 4 asiste, beson se do t’i duhet të ndryshojë mentalitetin e tij nëse kërkon të zgjidhet lojtari më i mirë i globit.
“Im at gjithmonë ma ka thënë këtë gjë, mbase është e vërtetë,” shprehet ai për BBC.
“Mendoj se në futbollin e sotëm, nëse do të fitosh një çmim si Ballon d’Or duhet të kesh një natyrë egoiste. Por unë nuk jam ashtu. Unë jam ai që jam.”
Topat e Artë të viteve të fundit janë ndarë mes Cristiano Ronaldo-s dhe Lionel Messi-t dhe të dy kanë nga pesë.
