Duke reflektuar mbi karrierën e tij deri më tani, ish-sulmuesi i Barcelona-s, Bojan Krkic, pranoi se nuk ishte i kënaqur që i kërkohej të bënte diçka që ishte në kundërshtim me personalitetin e tij. Sulmuesi që tani luan në Championship me Stoke City, foli rreth karrierës së tij gjatë një interviste për “El Pais”.
“Që nga dita e parë e karrierës sime, mu tha se duhet të isha bir k…”, tha ai. “Në fillim nuk isha shumë i vetëdijshëm për atë çfarë nënkuptonte, por gjatë viteve e kuptova. Luajta me Barcelonën më të mirë të të gjitha kohërave, luajta te Milan, Ajax, Roma dhe shënova gola në 4 kampionatet më të mëdha”.
Teksa disa mendojnë se karriera e Bojan është një premtim i paplotësuar, ai mendon se kjo është mënyra e gabuar për t’i parë gjërat. “A ja dola të isha lojtari që premtova? Epo, sa njerëz ëndërrojnë të kenë një karrierë të tillë? Ndihem me fat”. shtoi ai.
“Tek akademia e Barcelonës, shënova shumë gola, ashtu si edhe në ekipin e parë. Njerëzit të vendosin një nofkë. E imja ishte ‘Messi i ri’ dhe nëse nuk i arrin pritshmëritë e tyre, atëherë je një dështim. Por unë flas anglisht, italisht, spanjisht dhe gjuhën katalanase. Duhet më shumë guxim për të folur katër gjuhë, sesa për të fituar katër tituj”.
