Kosova si rezistoi fortunës së Holandës - Bota Sot
Kosova si rezistoi fortunës së Holandës

Hendboll

E mërkurë, 26 shtator 2018

Kosova si rezistoi fortunës së Holandës

Më: 3 qershor 2018 Në ora: 12:14
Pamje nga ndeshja

I ka ardhur fundi ndeshjeve të kombëtares së Kosovës në kualifikimet për evropianin e vitit 2018 për hendbolliste. Në ndeshjen e fundit hendbollistet tona u takuan me Holandën në Almere të Holandës. Ashtu si pritej, fitorja i takoi Holandës, që është superfuqi e hendbollit evropian e botëror dhe ka në formacion disa prej hendbollisteve më të mira në botë. Ndeshja përfundoi me rezultat 42:16 në të mirë të vendaseve. Pas pjesës së parë rezultati ishte 21:10.
Ndeshja u luajt në një atmosferë të vërtetë sportive. Vajzat tona patën përkrahje të një grupi të bashkëatdhetarëve tanë që ishin të zëshëm. Ndonëse e përballur me mungesë të disa prej lojtareve më të rëndësishme për shkak të lëndimeve, kombëtarja jonë pati paraqitje të mirë në momente. Sidomos në pjesën e parë hendbollistet e Kosovës shfaqën më shumë dhe në periudha rezistuan fuqishëm ndaj holandezeve.
Është kjo ndeshja e dytë mes Kosovës e Holandës. Më 1 tetor të vitit të kaluar në Prishtinë, Holanda fitoi me rezultat 40:12. Në ndeshjen e së shtunës Kosova pranoi dy gola më shumë, por shënoi katër më shumë.
Kosova i ka humbur të gjitha gjashtë ndeshjet në fazën e dytë kualifikuese por vetë paraqitja në këtë fazë është sukses. Në fazën e parë kishte fituar ndaj Gjeorgjisë dhe Izraelit dhe kështu siguroi fazën e dytë ku qëlloi në një grup shumë të fortë me Holandën, Hungarinë e Bjellorusinë. Holanda e Hungaria janë vende elitare të hendbollit botëror, ndërsa edhe Bjellorusia ka lojtare në nivelin më të lartë evropian. Ndërkohë kombëtarja jonë përbëhet nga lojtare të reja që bëjnë karrierë në liga evropiane dhe atë të Kosovës dhe ndeshjet me hendbollistet më të mira në botë do t’iu shërbejnë shumë atyre për të ardhmen.
Ndeshjen ndaj Holandës e përcjellën 2400 shikues në palestër. Ardiana Merditaj ishte më efikasja te Kosova me gjashtë gola. Nga katër herë shënuan Mirela Gjikokaj e Albina Rugova. Anouk Nieuwenweg me tetë gola dhe Lynn Knippenborg me shtatë gola u dalluan te holandezet.

Holanda – Kosova 42:16 (21:10)

Holanda: Van der Heijden, Bont 3, Snelder, Knippenborg 7, Smits 4, Amega 4, Groot, Dulfer, Freriks, Nusser 6, Schop 2, Jankoviq, Smeets 2, Housheer 6, Wester, Nieuwenweg 8
Kosova: Osmani, Ferataj 1, Kameri, S. Rexhepi. R. Rexhepi, Aliu, Krasniqi, Kelmendi, Merditaj 6, Marku 1, Rugova 4, Shehdadi, Stagova, Gjikokaj 4

Rezultatet e Kosovës në kualifikimet për “Euro 2018”
Faza e parë

Kosova – Gjeorgjia 30:19
Izraeli – Kosova 25:32

Faza e dytë
Hungaria – Kosova 37:12
Kosova – Holanda 12:40
Kosova – Bjellorusia 22:31
Bjellorusia – Kosova 41:18
Kosova – Hungaria 15:37
Holanda – Kosova 42:16

Sot mund të lexoni Shfletoni kopertinat
Sondazh
test