Grupi i gjakut mund të zbulojë se kush është në rrezik të shtuar për goditje në tru.
Një studim i fundit i botuar në revistën Neurology tregon një lidhje të fortë midis grupit të gjakut A dhe një rreziku në rritje të goditjes së hershme ishemike para moshës 60-vjeçare.
Pothuajse 90 për qind e të gjitha goditjeve në tru janë ishemike, domethënë ato ndodhin kur një mpiksje gjaku parandalon që gjaku të arrijë në tru.
Bazuar në 48 studime të ndryshme, studiuesit analizuan të dhënat shëndetësore të gati 17.000 pacientëve që kishin pësuar një goditje në tru. Mosha e tyre varionte nga 18 deri në 59-vjeç. Nga ana tjetër, më shumë se 599.237 raste mjekësore që nuk përfshinin goditje në tru ishin grupi i kontrollit.
Njerëzit ndahen në katër grupe kryesore të gjakut bazuar në atë nëse ata kanë pasur një goditje të hershme, një goditje të vonë ose jo.
Studiuesit kërkuan variante gjenetike në të gjithë gjenomin dhe midis grupeve të studimit. Ata gjetën dallime të rëndësishme gjenetike midis pacientëve që përjetuan një goditje në tru dhe atyre që nuk e përjetuan. Dallime u vunë re sidomos në gjenet që kodojnë grupin e gjakut AB0.
Të kesh grup gjaku A lidhet me një probabilitet 18% më të lartë për të zhvilluar një goditje të hershme. Kjo përfshin një rrezik më të lartë të zhvillimit të mpiksjes së gjakut, i cili mund të shkaktojë një goditje në tru. Në të kundërt, njerëzit me grupin e gjakut zero kishin 12% më pak gjasa për të pasur një goditje të hershme sesa grupet e tjera të gjakut.
“Asociacioni ishte shumë më i fortë për infarktin me fillimin e hershëm sesa për goditjen me fillim të vonë. Kjo ishte një surprizë për ne”, tha bashkautori i studimit Braxton Mitchell.
Megjithëse studimi i ri sugjeron se ekziston një faktor i fortë gjenetik që lidh grupin e gjakut me goditjen në tru, Mitchell, një epidemiolog gjenetik në Shkollën e Mjekësisë të Universitetit të Maryland, tha për Health se njerëzit nuk duhet të shqetësohen shumë për grupin e tyre të gjakut.
“Në një sistem të madh faktorësh, është vetëm një faktor i vogël rreziku në krahasim me të tjerët”, tha Mitchell, duke shpjeguar se grupi i gjakut është një nga shumë faktorë gjenetikë dhe të jashtëm që rrisin rrezikun e goditjes në tru.
