Ministria për Forcën e Sigurisë së Kosovës në kuadër të aktiviteteve të saj, rëndësi të posaçme i kushton realizimit të projekteve të ndryshme humanitare në dobi të të gjithë qytetarëve të Kosovës.
Sot, në organizim të Departamentit për Bashkëpunim Civilo–Ushtarak të MFSK-së, Komunës së Artanës (Novo Bërdës) iu dhurua një karrige stomatologjike, dedikuar fshatit Llabjan të kësaj komune.
Në ceremoninë e dorëzim-pranimit ishin të pranishëm; kryetari i Komunës së Artanës, zyrtarë të Drejtorisë së Shëndetësisë, stafi mjekësor i ambulancës së fshatit Llabjan, zyrtarë të lartë të FSK-së, etj.
Në emër të komandantit të FSK-së, gjenerallejtënant Rrahman Ramës, Afrim Veseli, karrigen ia dorëzoi kryetarit të Artanës, duke theksuar se FSK-ja është në shërbim të gjithë qytetarëve të Kosovës dhe komuniteteve pa dallim.
Ai premtoi se edhe në të ardhmen FSK-ja do t’i ndihmojë qytetarët e vendit pa dallime përkatësie etnike, gjuhësore apo fetare.
Ndërsa kryetari i Komunës së Artanës, Sevetisllav Ivanoviq, në emër të gjithë qytetarëve të komunës që ai drejton, falënderoi FSK-në për ndihmën e ofruar duke thënë se: “Karriga stomatologjike, për ne ka qenë prioritet, si pajisje mjaft e rëndësishme në shërbim të gjithë qytetarëve të kësaj ane, sidomos në shërbim të fëmijëve dhe nxënëseve”, tha Ivanoviq.
