Zgjedhjet e brendshme në Aleancën për Ardhmërinë e Kosovës, në të gjitha nivelet e saj, mbahen në periudhën shkurt – maj 2018.
Kështu ka vendosur sot Këshilli Drejtues i Aleancës për Ardhmërinë e Kosovës, në një mbledhje të kryesuar nga kryetari i kësaj partie, kryeministri Ramush Haradinaj.
Aleanca këtë proces e konsideron, ndër detyrat më të rëndësishme të radhës, kjo me qëllim të demokratizimit dhe të hapjes së mëtutjeshme të partisë.
Ishte vlerësim unanim që AAK, të vazhdojë të jetë e hapur për të gjithë ata që besojnë, se kontributin e tyre për proceset politike në parti dhe në vend, mund ta japin përmes kësaj partie.
“Të synojmë afrimin i secilit qytetar të vendit me Aleancën, me strukturat tona në çdo cep të Kosovës. Aleanca ka kuadro të dëshmuara në proceset e deritanishme dhe këtyre strukturave duam ti shtojmë edhe vlera të reja me afrimin e të rinjve, grave, ndërmarrësve, shoqërisë civile dhe profesionistëve tjerë të ndryshëm”, tha Haradinaj.
Zgjedhjet e fundit në AAK janë mbajtur në vitin 2015, dhe zgjedhjet e reja përmbushin kriterin statutar që ato të organizohen në afatin e rregullt.
