Pesëmbëdhjetë marsi njihet si “Dita Ndërkombëtare e Konsumatorit”, që për qëllim ka mbrojtjen e konsumatorëve. Mbrojtja, ka të bëjë me ruajtjen e shëndetit dhe sigurisë së konsumatorëve, si dhe me mbrojtjen e tyre nga çdo praktikë abuzive e tregtarëve. Për këtë sot do të mbahet tryezë ku do të diskutohet për “Ditën Ndërkombëtare të Konsumatorit”.
Ministri i Tregtisë dhe Industrisë (MTI) Bajram Hasani, tha se MTI-ja ka program për mbrojtjen e konsumatorëve.
“Pas marrjes së mandatit kemi marrë masa të ndryshojmë Ligjin dhe të harmonizojmë me ligjet e BE-së. Unë do të dëshiroja që Ligji të miratohet sa më shpejt në Kuvendin e Kosovës”, tha ai sot në emisionin e mëngjesit “Mirëmëngjesi Kosovë”.
Ai bëri me dije se qytetarët e Kosovës mund të lajmërojnë në linjat telefonike në çdo kohë ku mund të shkelen të drejtat të tyre.
“Inspektorati ka shqiptuar edhe gjoba për ata që kanë shkelur të drejtat e konsumatorëve dhe do të vazhdojmë me punë”, deklaroi Hasani.
Kurse për skandalin e mishit, Ministri i Tregtisë dhe Industrisë (MTI) Bajram Hasani, theksoi se janë të gatshëm të veprojnë.
Ndryshe Më 15 mars 1962, presidenti amerikan Xhon F. Kenedi miratoi Ligjin për të drejtat e konsumatorëve.
Ndërsa, me Rezolutën 39/248, me 9 prill 1985, Kombet e Bashkuara kanë miratuar Udhëzimin për kujdesin apo mbrojtjen e konsumatorit, derisa Ligji për mbrojtjen e konsumatorët në Kosovë është miratuar në qershorin e vitit 2004, në Kuvendin e Kosovës.
Ky ligj përfshinte të drejtën e informimit, të sigurisë, të drejtën për të zgjedhur dhe për t’u dëgjuar. Që nga ajo kohë, 15 marsi është Dita Botërore e të Drejtave të Konsumatorëve.
Në vitin 1985, Asambleja e Përgjithshme e Kombeve të Bashkuara njohu universalitetin e të drejtave të konsumatorëve, kohë kur ajo miratoi direktivat për mbrojtjen e konsumatorëve, si dhe katër të drejta të tjera: të drejtën e përmbushjes së nevojave bazë, të drejtën e zhdëmtimit, të drejtat për edukimin e konsumatorëve dhe të drejtën për një mjedis të shëndetshëm.
