Organizata “Demokracia Studentore” nëpërmjet një komunikate për media ka kërkuar nga Këshilli Drejtues i Universitetit të Prishtinës “Hasan Prishtina” në mbledhjen e radhës që ta vendos si pikë të rendit të ditës edhe shkarkimin e rektorit të Universitetit të Prishtinës Marian Dema, me arsyetim se ai po e degradon këtë institucion.
“Kërkojmë nga këshilli drejtues që në mbledhjen e radhës ta vendosin si pikë të rendit të ditës edhe shkarkimin e rektorit Marian Dema, ndryshe protesta nuk do t’i ndalojmë deri në shkarkimin e tij”, thuhet në njoftimin për media. “Këtij rektori tashmë i janë grumbulluar një varg veprash penale duke u nisur për rastin ‘Graniti’ me tenderat te ‘Pishat’, pastaj kallëximi penal për 900 mijë euro të taksapaguesve të këtij vendi, shpërlarja e parave nëpërmjet OJQ-ve, ndikimi i tij për punësime të ndryshme etj”, thuhet më tej në njofitmin për media të “Demokracia Studentore”.
Mexhid Ramusa nga Demokracia Studentore ka thënë se këshilli drejtues i Universitetit të Prishtinës “Hasan Prishtina” duhet ta shqyrtoi kërkesën dhe shqetësimet e studentëve për shkarkimin e rektorit derisa po degradohet ky institucion. “Ne do të vazhdojmë me protestat studentore, të cilat janë të bazuara në keqpërdorimet e rektorit, i cili në vazhdimësi e ka sjellë vetëm degradimin e UP-së. Ai ka qenë pjesë e tërë proceseve dhe ky institucion nuk ka ndryshuar asgjë në mënyrë pozitive. Gjithashtu ai vazhdimisht po e keqpërdor edhe pozitën zyrtare duke mos hartuar asnjëherë plane strategjike se si do të zhvillohet UP-ja gjatë së ardhmes”, ka thënë Ramusa. Ai ka sqaruar se do të kërkojnë që rektori Marjan Dema të shkarkohet nga Këshilli Drejtues i Universitetit, ndërsa protesta do të përcillet edhe me disa aksione simbolike të studentëve. “Ne nuk do të ndalemi derisa, ky rektor të shkarkohet”, ka shtuar Ramusa.