Fshati Bellee komunës së Deçanit në vitin e ardhshëm synon që të bëhet pikë turistike për qytetarët e Kosovës.
Kjo pasi që sot kanë filluar punimet për ndërtimin e rrugës së këtij fshati me një të kaluar të ndritshme historike.
Kryetari i komunës së Deçanit Bashkim Ramosaj tha se ky investim është i një rëndësie të veçantë sepse rritë zhvillimin turistik të kësaj zone dhe mundëson kthimin e banorëve në ketë vendbanim të djegur gjatë tri luftërave.
Ramosaj: Po flasim për fshatin që ka një të kaluar të ndritshme historike
“Po flasim për një lokalitet i cili e ka destinimin si lokalitet historik që brenda këtij vendbanimi ka trashëgimi kulturore arkeologjike por që ka të bëjë edhe me trashëgiminë natyrore. Po flasim për fshatin Bella i cili e ka një të kaluar të shndritshme historike kombëtare por që është i pabanuar për shkak të mungesës së infrastrukturës”, tha Ramosaj.
Sipas tij i ka ardhur koha që ky fshat të bëhet me infrastrukturë dhe t’u bëhet e mundshme banorëve të këtij fshati që të kthehen dhe të investojnë në vendlindjen e tyre.
Ramosaj: Qëllimi është ngjizja e turizmit
“I k ardhë koha edhe këtij fshati që të ketë infrastrukturë qoftë me rrugë qoftë me ndriçim e që banroëve të këtij fshati t’ua bëjë të mundshme që të kthehen në këtë vendbanim e njëkohësisht për neve e ka rëndësinë në aspektin turistik sepse në konceptin zhvillimor të komunës së Deçanit duke falënderuar edhe Ministrinë Zhvillimit Rajonal...qëllimi është që të jetë destiancioni i parë, ngjizja e parë e turizmit në komunën e Deçanit ku banorët e këtij fshati kanë premtuar se brenda këtij viti do të fillojë ndërtimi i bujtinave që të jetë në funksion të zhvillimit të turizmit në këtë pjesë”, tha Ramosaj.
Për ndërtimin e infrastrukturës në këtë fshat ka dhënë ndihmë Ministria e Zhvillimit Rajonal me ç’rast zëvendësministrja Magbule Shkodra tha se kanë zgjedhur komunën e Deçanit e cila ka një zhvillim më të ultë ekonomik.
Shkodra: Kjo është bërë me qëllim që Deçanit t’i hapen rrugët e turizmit
“Dua të them se Ministria jonë këtë e ka bërë më qëllim që komunës së Deçanit t’i hapen rrugët për zhvillimin e turizmit për bjeshkët e bukura që janë këtu,. Në mënyrë që të gjithë qytetarët e Kosovës të mund ti shijojnë ato. Dua të rikonfirmoj se Ministria jonë do të vazhdojë të përcjelle projektet që po I financojmë e po ashtu të kontribuojmë edhe vitin e ardhshëm në mënyrë që të gjithë të mund të jemi prapa komunës së Deçanit të zhvillohet turizmi, të zhvillohet ekonomia”, tha Shkodra.
Ajo tha se Ministria e Zhvillimit Rajonal ka investuar me 100 mijë euro me participim të komunës së Deçanit.
Punimet në fshatin Belle janë paraparë që të kryhen në vitin e ardhshëm dhe i gjithë investimi do të kushtojë gjysmë milion euro.