Aksidente dhe kolona nga ndërprerja disa vjeçare e punimeve në rrugë

Kosova

Aksidente dhe kolona nga ndërprerja disa vjeçare e punimeve në rrugë

Më: 22 korrik 2018 Në ora: 15:54
Autoudha Prishtinë-Vushtrri-Mitrovicë

Autoudha Prishtinë-Vushtrri-Mitrovicë, ende me probleme në të njëjtin fshat. Është fjala për fshatin, Lum i madh të Vushtrrisë, ku punimet janë ndërprerë tash e sa vite, siç u tha atëherë për shkak të kontesteve pronësore, por për pasojë aty shkaktohen kolona të gjata dhe aksidente.

Sipas banorëve në këtë fshat, vozitësit janë shumë të pakujdesshëm dhe shpejtësia që ata e përdorin në këto rrugë është shumë e lartë, gjë që shkakton edhe aksidente.

 Përpos aksidenteve, ata thonë se krijohen kolona të gjata, e në veçanti në mbrëmje. Shqetësim kanë edhe bizneset të cilat prapa kamerave thonë se kjo gjendje iu ka sjellë vështirësi të mëdha në bizneset e tyre në atë pjesë.

Behar Bajrami nga fshati Lum i madh, ku rruga ka mbet e pa përfunduar tash e disa vite, thotë se kolona ta gjata ka në mbrëmje.

Bajrami: Në mbrëmje bëhet shumë tollovi 

“Çdo kohë, sidomos në mbrëmje bahet shumë tollovi e madhe kolonë e gate”, tha ai. Edhe për bashkatdhetarët, kjo rrugë është shqetësim, edhe pse periudha e qëndrimit të tyre në Kosovë është e shkurtë.

Hajriz Aliu ankohet për mungesën e shenjave në këtë pjesë ku janë ndërprerë punimet.

Aliu: Rruga pa shenja 

“I kam thën edhe familjarëve të mi si është e mundur që vetura e cila vjen nga rruga me shpejtësi prej 100-120 km/orë, me has në një rrugë thuajse 1 kahëshe dhe pa lajmërimin e shenjave…..Unë i kam thane të gjithëve, gjithmonë qytetarët duhet me shpreh shqetësimin e tyre. Në qoftëse nuk tregojnë, ata komunart që merren me këtë punë flejnë edhe thonë mirë, është n’rregull, s’po ankohet askush, ankesat të qojnë nga ana pozitive”, tha ai. Enis Osmani po nga ky fshat, thotë se kolonat janë shumë të gjata.

Osmani: Ka vonesa të mëdha kur bllokohet kjo rrugë 

“Ndonjëherë nuk e di çfarë kohe është, kur po bllokohet rruga po vonohet shpesh, kolonë e madhe”, tha ai.

Media ditë për parë ka raportuar për aksidente, si dhe kolona në këtë fshat, të cilat mbërrijnë disa kilometra, madje edhe deri në Vushtrri.

Media ka tentuar të marrë deklaratë edhe nga përfaqësuesit e Ministrisë së Infrastrukturës, por këta të fundit nuk iu janë përgjigju telefonatave.

Kjo rrugë është një nga arteriet kryesore e Republikës së Kosovës dhe është pjesë e drejtimit rrugor në kuadër të rrjetit bazik të transportit të Evropës Juglindore.

commentFirst article
Sot mund të lexoni Shfletoni kopertinat