Tragjeditë familjare, dyshimet për tradhti, abuzimi me alkoolin e bixhozin dhe xhelozia bëhen shpesh shkaktarë të dhunës që përjetojnë gratë në Kosovë nga partnerët e tyre, e që ndër vite shumë raste të tilla kanë përfunduar tragjikisht.
Për një rast të tillë ka rrëfyer në Polici një grua nga Rahoveci, e cila e denoncoi bashkëshortin, me të cilin është e martuar që 32vjet, e i cili dyshohet se në vazhdimësi ka ushtruar dhunë ndaj saj.
Në dëshminë e saj të dhënë para hetuesve policorë thuhet se gjithë këto vjet ka përjetuar dhunë fizike e psikike sistematikisht, por rasti i fundit që ka ndodhur e shtyu atë të kërkojë ndihmë në Polici.
Burimet brenda Prokurorisë thonë se sipas viktimës, burri i saj është i varur nga alkooli dhe për pasojë i shkakton në vazhdimësi probleme.
Sinjali mëson se si rezultat i raportimit, i dyshuari është kapur nga Policia dhe është shoqëruar në stacion policor, ku është intervistuar lidhur me denoncimin kundër tij.
Ndaj tij, Prokurori i Shtetit ka urdhëruar caktimin e masës së ndalimit dhe inicimin e rastit për veprën penale “Dhunë familje”.
