Mosmarrëveshjet e momentit mes qytetarëve shpesh herë përcillen me ofendime e kërcënime ndaj njëri-tjetrit. Madje nuk janë të rralla rastet kur ato shpërthejnë në dhunë, duke u përleshur fizikisht mes vete.
Një rast i tillë ka ndodhur së fundi në Prishtinë, ku një person dyshohet se ka sulmuar një person tjetër.
Burimet kanë bërë me dije se e gjithë ngjarja ka ndodhur në rrugën ‘Zija Shemsiu’, ku sipas dëshmisë së viktimës dhënë organeve të hetuesisë, i dyshuari e ka sulmuar duke e goditur me kondak të armës në kokë.
Si pasojë e kësaj, 33-vjeçari ka marrë lëndime trupore, për çka ka kërkuar ndihmë mjekësore në spital.
I dyshuari, i cili ka arritur të arratiset nga vendi i ngjarjes tashmë është identifikuar nga Policia.
Pas përfundimit të procedurës së intervistimit në stacion policor, Prokurori i Shtetit ka urdhëruar inicimin e rastit për kryerjen e veprës penale ‘Lëndim i rëndë trupor’ dhe ‘Armëmbajtje pa leje’.
