Abuzimi me substanca narkotike nga të rinjtë mbetet një shqetësim i madh në shoqërinë kosovare. Edhe më shqetësues këtë dukuri e bën mungesa e trajtimit preventiv nga institucionet. Varësia nga droga sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike.
Një rast i tillë është zbuluar së fundmi në Lipjan, pasi një 42-vjeçar gjeti një sasi të drogës në shtëpi, që i përkise djalit të tij.
Burimet brenda Prokurorisë kanë bërë me dije se i njëjti u detyrua ta denoncojë rastin në Polici, me ç’rast edhe u zbulua se i dyshuari 18-vjeçar është përdorues i narkotikëve.
Për shkak të posedimit të drogës, i dyshuari është shoqëruar në stacion policor, ku është intervistuar nga hetuesit policorë.
Me urdhër të prokurorit, ndaj tij është iniciuar rasti për veprën penale ‘Posedim i paautorizuar i narkotikëve, substancave psikotrope ose analoge’.
Sipas Kodit Penal të Kosovës, është e jashtëligjshme që qytetarët të blejnë, posedojnë apo shpërndajnë substanca narkotike dhe mund të dënohen me gjobë apo burgim, varësisht nga sasia dhe lloji i lëndës narkotike që iu kapet nga autoritetet e rendit.
