Policia e Kosovës njoftoi të mërkurën se ka gjobitur me 150 euro shoferin e një veture, i cili është incizuar duke duke bërë tejkalim në vijë të plotë në rrugën Gjilan-Prishtinë.
Sipas policisë, i njëjti ka rrezikuar pjesëmarrësit e tjerë në trafik.
“Njësiti rajonale i trafikut rrugor Gjilan falë bashkëpunimit me qytetarë, kanë identifikuar një kundërvajtës i cili gjatë drejtimit të automjetit të tij në fshatin Bresalc, aksi rrugor Gjilan- Prishtinë në bazë të video incizimi të pranuar në E-mail adresën zyrtare, shihet duke bërë tejkalim në vijë të plotë, me të cilin veprim rrezikon pjesëmarrësit e tjerë në trafik dhe bie ndeshë me rregullat e komunikacionit rrugor”, thuhet në komunikatën për media.
Përveç gjobës, atij i janë shqiptuar edhe dy pikë negative dhe masa e përkohshme e ndalim vozitjes në afat prej tre muaj.
“Drejtoria rajonale e Policisë në Gjilan, inkurajon mediat dhe qytetarët që për të gjitha kundërvajtjet mund të njoftojnë stacionin më të afërm të Policisë, apo përmes aplikacionit digjital ‘Lajmëro Policinë’, E-mail: [email protected] dhe numrat kundestarë:192; 03850807001. Të dhënat e juaja do të ruhen ne konfidencialitet të plotë”, thuhet më tej.
