Numri i rasteve të dhunës në familje në vendin tonë ka marrë përmasa shqetësuese.
Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre dhe anëtarët tjerë të familjes.
Ndihmën e Policisë e ka kërkuar një grua në fshatin Magurë të Lipjanit, e cila ka denoncuar bashkëshortin e saj për dhunë.
Burimet kanë bërë me dije se 23-vjeçarja ka deklaruar që bashkëshorti i saj ka ushtruar dhunë fizike ndaj saj për dy ditë me radhë. Si pasojë e dhunës së përjetuar, viktima ka marrë lëndime trupore dhe ka kërkuar ndihmë mjekësore në spital.
Si rezultat i denoncimit, i dyshuari është shoqëruar në stacion policor për intervistim, ku mes të tjerash edhe ai e ka akuzuar bashkëshorten e tij për dhunë.
Me urdhër të prokurorit, ndaj 26-vjeçarit është iniciuar rasti për veprën penale ‘Dhunë në familje’.