(Basri Çapriqi-t 1960 - 2018)
sot qenkan bërë bashkë
deti me qiellin
për t' ia dëgjuar dhimbjen
miqëve mbi tokë
në takim ditëlindjesh
vdekja tinëzisht
me ndërkëmbzën e saj
rrëzon edhe njeriun
që deshi njësoj valën e detit
erën e qiellit
dhe aromën e tokës
mik i dashur
të ruaja në kujtime
të Prishtinës
kur rreshtonim vargje poetike
studentore
me frymëzim lirie
në vitet e shkelura tetëdhjetë
në kohë tanksesh
demostaratash e ëndërrash
lirie
ah ti e doje shumë lirinë
kur na flisje për ulqinakët
dhe Ulqinin
dhe matnim autoktoninë
iliriane
me mijëvjeçarët e ullinjëve
të qytetit tënd
në verën e fundit të
rinisë sime
para jetës së gurbetit tim
buzë ranës
në qytetin e ulkonjave
ti mu bëre ciceron
që njihte edhe gurët në kala
atëhere kur
ulqinakët mësynin
Amerikën
e te moli i kalasë
motrat dhe nënat
mbushnin detin me lot
i njëjti det
që do të më kujtojë
vargjet e tua plot diell
miku im Basri.
Lamtumirë Poet.
Padova , 14 janar 2018