Ministrja e Integrimit Evropian, Dhurata Hoxha ka pritur në takim Gretchen Birkle, zëvendës asistenten e Administratorit të USAID-it, Byroja për Evropë dhe Euro-Azi në Uashington, me ç’rast diskutoi për të arriturat dhe sfidat e procesit integrues.
Në një njoftim dërguar mediave, bëhet e ditur se Hoxha, vuri në pah të arriturat e procesit integrues dhe sfidat e integrimit euro-atlantik, duke vlerësuar progresin e Kosovës në këtë drejtim. Ministrja vlerësoi si tejet të rëndësishme përkrahjen e USAID-it në realizimin e prioriteteve shtet-ndërtuese, sundimin e rendit dhe ligjit si dhe zhvillimin ekonomik.
“USAID me projektet e veta, është vërtetë përkrahje e fuqishme e qytetarëve amerikan për Kosovën. Shpreh mirënjohje të thellë për përkrahjen SHBA-së dhe të USAID-it, por edhe përkushtimin tonë të plotë për avancimin e mëtejmë të këtij bashkëpunimi”, tha Hoxha.
Ndërsa Birkle theksoi se USAID mbetet i përkushtuar në përkrahje të prioriteteve të Kosovës.
Ajo vlerësoi lart, të arriturat në procesin integrues, realizimin e MSA-së dhe Agjendën Evropiane të Reformave duke shtuar se USAID-i mbetet i përkushtuar për të ndihmuar Kosovën në zhvillimin ekonomik, sundimin e ligjit dhe fusha të tjera në interes të vendit.