Lideri i LDP-së, Çedomir Jovanoviq ka thënë se serbët në Kosovë janë peng të Beogradit dhe se deputetët e Listës Serbe janë ekspoziturë e politikës beogradase.
“Na nevojiten serbët në Kosovë, na nevojiten shqiptarët e Kosovës, janë të nevojshëm për shoqërinë kosovare. Fatkeqësisht, ata janë peng të Beogradit, kështu kanë qenë gjithnjë. Edhe Perëndimi kështu sillet, dhe këtë gjithmonë ua them”, ka thënë Jovanoviq i cili ka qëndruar të premten në Prishtinës.
Ai vlerëson se shoqëria kosovare nuk ka jetë normale ashtu siç i duhet.
“Nuk ka përfaqësues të serbëve, të cilët, kur shkojnë në parlament, marrin për obligim që të kujdesën për njerëzit që i kanë votuar. Ata aty janë si ‘deputetët me qira’ të cilët mendojnë për Beogradin, e jo për serbët në Kosovë dhe shpesh ato interesa nuk janë të njëjtë. Për këtë veriu i Kosovës është aq i palumtur”, ka thënë Jovanoviq.
Ai e ka përsëritur qëndrimin se Serbia tregimin e saj tragjik si shtet në Kosovë e ka përmbyllur në vitin 1999.
Siç thotë, presidenti i Serbisë, Aleksandar Vuçiq nuk e ka të lehtë sot, sepse duhet të paguaj çmimin për të gjitha gabimet.
“Por kur merresh me politikë në Serbi, atëherë duhesh të jesh gati për atë. Ai mundësinë e tij duhet ta kërkojë së bashku me të gjithë neve në atë ardhmërinë ndryshe të cilën mund ta arrijmë dhe duhet ta arrijmë”, thotë ai.
I pyetur se a pret që Serbia, kur bëhet fjalë për Kosovën, të merr ndonjë vendim përfundimtar deri në fund të vitit dhe se a do të jetë Vuçiq ai i cili këtë do t’ua thotë serbëve, Jovanoviq përgjigjet:
“Të gjithë e dinë atë. Dhe të gjithë e dinë se aty më nuk ka hapësirë për manovrim. Në të kundërtën, Koshtunica edhe sot do të ishte kryeministër… Vuçiq është lider i vendit tim dhe nëse ai nuk ka forcë që ta thotë të vërtetën, kush tjetër duhet ta thotë atë?”, transmeton lajmi.net.
Sipas tij, problemi është diçka tjetër – Vuçiq mund ta marr vendimin, por dikush duhet të jetojë me atë vendim, duhet ta kuptojë, të shfrytëzojë mundësitë që ajo i hapë.
“Neve nuk na duhen marrëdhënie me Kosovën me të cilat ne vetëm do t’i ndërronim istikamet. Nuk na duhet neve Kosova e cila do të bëhet anëtare e Kombeve të Bashkuara, e ne më pas me Kosovën të jemi në një përplasje pesë, 10 apo 15 vjeçare”, thotë lideri liberal demokrat.
