Në Kosovë, nuk mbet asnjë gjë pa u degraduar, e në këtë degradim u përdhosën edhe veteranët e merituar nga manipulimi që iu bë me listat e tyre, ku numrin e rriten aq shumë sa, presidenti Thaçi tha se po të ishin 60 mijë veteranë nuk do të kishim nevojë për forcat e NATO-s.
Megjithatë, këto lista kryesisht janë bërë nga njerëz të afërt me PDK-në dhe AAK-në, të cilët i mbajnë me para militantët që kur të vjet koha për vota, ata të vjedhin në mënyrë që këta të mbesin në pushtet.
Kështu thotë analisti politik, Faton Mehmeti, i cili shton se, është një zingjir që iu shërben këtyre në pushtet për të vazhduar ende që të mbesin në pushtet.
“Andaj edhe nuk janë ndaluar pagesat për veteranët, e të cilët janë mbi 40 mijë që vazhdojnë të marrin para, duke dëmtuar mjaftë shumë buxhetin e vendit tonë edhe ashtu të varfër”, thotë Mehmeti për gazetën “Bota sot”.
“I tërë manipulimi është bërë nga njerëz në pushtet, e të cilët, pra militantët e tyre kryesisht janë hajdut, njerëz të krimit, që kur të është nevoja i përdorin qoftë për të kërcënuar gazetarët, biznesmenët që nuk janë në lidhje me ta dhe qoftë për të vjedhur votat”, shton ai.
Mehmeti thotë se duhet me u ndaluar krejt pagesat për veteranët derisa një komision nga jashtë, pasi nga Kosova thotë që nuk ka shanse që mos të korruptohet, që të verifikoj kush ishte e kush jo veteran, ndryshe pagesat duhet të ndalen.
“Vetëm një shtrëngim i fortë do të bënte që vërtet njëherë e përgjithmonë të dihet kush ishte veteran e kush manipulator”, përfundon Faton Mehmeti.
