Ministri i Arsimit dhe Shkencës Jeton Shaqiri, në takimin me përfaqësuesit e Komisioni Evropian ku diskutuan për politikat prioritare në kuadër të Programit të Reformave Ekonomike 2023-2025 deklaroi se vendi do të ecë përpara me shpejtësi, nëse bëjmë harmonizimin e arsimit me tregun e punës.
Kjo është ajo për të cilën ne përpiqemi vazhdimisht dhe është qëllimi kryesor i politikave arsimore që ne krijojmë përmes një qasjeje inkluzive – të krijojmë kuadër të përgatitur mirë, gjegjësisht kapitali njerëzor i cili do t’i përgjigjet nevojave të shoqërisë në të gjitha sferat.
“Në këtë drejtim, ne jemi të fokusuar në përmirësimin e cilësisë në të gjitha nivelet e arsimit. Në rrjedhë janë reformat e rëndësishme në sistemin arsimor kombëtar, por ende duhet të investohet për përmirësimin e rezultateve mësimore, theksoi Shaqiri, duke theksuar se ka filluar ndryshimi i programeve mësimore dhe teksteve shkollore në arsimin fillor, për të mundësuar mësimin me mirëkuptim, në vend të memorizimit faktik të të dhënave”, deklaroi Shaqiri.
Si risi, theksoi ai, është zhvillimi i vlerësimit të ri nacional gjegjësisht testimi shtetëror, i cili do të plotësojë kushtet për zhvillimin dhe plotësimin e sistemit të ndjekjes dhe vlerësimit të arritjeve të nxënësve në nivel kombëtar në arsimin fillor.
Ministri gjithashtu theksoi se është duke u zhvilluar edhe një reformë e thellë në arsimin e mesëm profesional për të formuar të rinj të gatshëm për t’iu bashkuar tregut të punës menjëherë pas përfundimit të tij, por edhe për të pasur një bazë të mirë për avancimin e mëtejshëm arsimor nëse marrin një vendim të tillë.
“Përmes dialogut social me bashkësinë e biznesit, shkollat profesionale dhe pushtetet vendore, prezantuam konceptin e arsimit dual, i cili bazohet në të mësuarit përmes punës dhe është pranuar gjerësisht në kohë shumë të shkurtër. Në këtë proces, të gjithë së bashku identifikojmë nevojat e një stafi të caktuar në nivel lokal, krijojmë politikë regjistrimi dhe avancojmë arsimimin e të rinjve. Besojmë se me ngritjen e Qendrave Rajonale të Arsimit Profesional dhe Shkencës do të trajtohet kultura inovative në nivel rajonal dhe nacional. Për momentin kemi tre institucione të tilla që përveç arsimit formal dhe joformal ofrojnë edhe validim të mësimit joformal dhe informal, trajnime për kompanitë, trajnime për personat e papunë dhe realizim të mësimit praktik për shkollat nga komunat ku ndodhen dhe nga rajonet përkatëse, u shpreh Shaqiri, duke shtuar se me qëllim të përshpejtimit të procesit të optimizimit dhe racionalizimit të rrjetit të shkollave i cili ka filluar kohë më parë për të shfrytëzuar sa më mirë burimet e kufizuara financiare dhe njerëzore, në periudhën e ardhshme, në bazë të analizave, do të përcaktohen dy Qendra të reja Rajonale, si dhe mundësia e hapjes së një Qendre Rajonale Private për Arsim dhe Aftësim Profesional”, deklaroi ai.
Ai shtoi gjithashtu se bëhet fjalë edhe për prezentimin e një formule të re për financimin e arsimit fillor dhe të mesëm, sepse formula e tanishme nuk nis nga ajo se sa para u duhen shkollave për të ofruar arsim cilësor për të gjithë nxënësit dhe për të përmbushur standardet arsimore.
“Formula e re duhet të sigurojë mjete të mjaftueshme për ngritjen profesionale të mësimdhënësve, mjete për gjithëpërfshirje më të madhe në shkolla dhe plotësimin e të gjitha nevojave, tha Shaqiri, duke bërë të ditur se do të hartohet dhe zbatohet formula e re për financimin e arsimit të lartë, gjegjësisht deri në vitin 2025 Këshilli Nacional i Arsimit të Lartë dhe Kërkimit Shkencor duhet të përgatisë Dekret për masat dhe kriteret e financimit të arsimit të lartë”, shtoi ai.
“Kemi plan dhe energji të mirë për të arritur qëllimet e vendosura. Gjëja më e rëndësishme është që të ketë kohezion ndërmjet institucioneve të sistemit dhe pjesëmarrësve të shoqërisë në përgjithësi. Pikërisht kjo garanton suksesin dhe përshpejtimin e procesit integrues të vendit tonë në Bashkimin Evropian”, nënvizoi Shaqiri.
