Kovachevski në Beograd, Maqedonia e Veriut dhe Serbia mbesin të vetme në Ballkanin e Hapur
Kryeministrja serbe, Ana Bërnabiq, ka pritur në takim homologun e saj nga Maqedonia e Veriut, Dimitar Kovachevski, sot në Beograd.
Duke përmendur “rrugën europiane” për të dyja vendet, Kovachevski përmendi sërish Ballkanin e Hapur, për të cilin u raportua se ka marrë fund dhe se shtetet pjesëmarrëse janë orientuar kah Procesi i Berlinit.
“Me kryeministren serbe Ana Bërnabiq vlerësuam se prosperiteti dhe stabiliteti i të gjithë rajonit dhe integrimi europian i vendeve tona janë të lidhura me marrëdhënie të mira dypalëshe. Është jashtëzakonisht e rëndësishme që ne të punojmë së bashku në sfidat dhe përparimin e ekonomive përgjatë rrugës europiane. Përkushtimin tonë për bashkëpunim e tregojmë përmes aksioneve dhe me organizimin e përbashkët të panairit të dytë ndërkombëtar për verën, ushqimin dhe turizmin “Vizioni i verës së Ballkanit të Hapur” dhe me nënshkrimin e sotëm të Memorandumit për promovimin e bashkëpunimit në trafikun hekurudhor”, ka shkruar kryeministri i Maqedonisë së Veriut në X.
