Kryetari i “Lëvizjes Populli”, Skender Rexhepi, sot nënshkroi marrëveshje bashkëpunimi me BDI-në për zgjedhjet e ardhshme presidenciale dhe kuvendare. Në fjalimin e tij pas nënshkrimit të marrëveshjes, Rexhepi tha se “Fronti evropian” është nismë e cila do të jetë me këmbë të mbarë.
Ai gjithashtu lavdëroi punën e BDI-së në vitet e kaluara, ndërsa u shpreh i bindur edhe për realizimin e qëllimeve në të ardhmen.
Por, çfarë deklaronte Skender Rexhepi për Ali Ahmetin, sa ishte pjesë e Alternativës, parti nga e cila u zgjodh deputet.
Në një fjalim të kësaj partie së bashku me Aleancën për Shqiptarët para dy viteve në Çair, Rexhepi deklaronte se “Ali Ahmeti duhet të dërgohet në Moskë e Beograd, atje ku e ka vendin ideologjikisht”.
“Do e kisha lutur Ali Ahmetin dhe komandant kërmillin që janë me lartësi në hava, të zbresin në tokë, pasi jeta e njerëzve nuk është këngë dhe humor, por është tragjedi dhe dhimbje që ata 20 vite e kanë mbjellur në tokë, ndërsa vetë kanë qëndruar në hava, e shpresojmë që era t’i dërgojë atje ku edhe ideologjikisht e kanë vendin në Beograd dhe Moskë”, deklaroi atëherë Skender Rexhepi.
Ndryshe, Rexhepi si deputet në Kuvend u zgjodh nga radhët e partisë Alternativa, ndërsa pasi doli nga kjo parti themeloi partinë e tij “Lëvizja Populli”. Theksojmë që sot Alternativa është pjesë e koalicionit të partive opozitare shqiptare.
