Lideri i VMRO-DPMNE, Nikolla Gruevski që ishte mandatari i parë për formimin e Qeverisë kishte pranuar propozim-ligjin për gjuhën shqipe, gati të ngjajshëm me ate që e ka pranuar lideri i LSDM, Zoran Zaev, thotë një përfaqësues i BDI-së, i cili ka qenë i informuar lidhur me rrjedhën e bisedimeve për formimin e Qeverisë.
“Propozim-Ligji për gjuhën shqipe ka qenë identik me ate që e ka pranuar LSDM. Ka ndonjë ndryshim minimal. Tani VMRO-DPMNE luan lojën e dyftyrësisë. Pengesat kanë qenë tek Prokuroria Speciale”, thotë funksionari i BDI.
Sipas tij, Ali Ahmeti dhe Musa Xhaferri duhet të dalin të flasin dhe të sqarojnë se çfarë kishte pranuar BDI. Kohë më parë Ina informoi për takimet e zhvilluara në Mavrovë dhe më pas në hotel “Marriot” në Shkup, ku ishin harmonizuar shumë qëndrime midis dy partnerëve të koalicionit të deritanishëm qeveritar VMRO-DPMNE dhe BDI. BDI duhet të zbardhë marrëveshjen që kishte diskutuar me VMRO-DPMNE.
