Prej sot deri më 10 prill, prej orës 10 deri në orën 20, do të jetë i hapur për vizitorët Panairi i 29-të i librit, i cili është ndër manifestimet më të vizituara në Panairin e Shkupit.
Organizatorët për sivjet paralajmëruan pjesëmarrjen e 80 botuesve dhe shitjen e rreth 80.000 librave, disa me zbritje madje deri në 70 për qind.
"Edhe sivjet koncentrim më i madh do të përqendrohet te autorët vendorë dhe të huaj, veprat letrare bashkëkohore dhe klasike, letërsia profesionale, shkencore dhe beletristike, tekstet shkollore dhe doracakët shkollorë, enciklopeditë dhe veprat nga sfera e kulturës dhe artit", kumtoi Panairi i Shkupit, organizator i ngjarjes.
Panairin e librit mbrëmë në mënyrë solemne e hapi zëvendësministri i Kulturës, Dragan Nedellkoviq i cili theksoi se gati për tri dekada paraqet projektin më të madh të realizimeve më të reja krijuese dhe vend kur gjurmohet kuptimi dhe sfidat të cilat i ofron fjala e shkruar.
Krahas ofertës së titujve, vizitorët ditëve vijuese të panairit mund të marrin pjesë në 60 promovime të veprave të reja dhe autorëve (Në Qendrën promovuese në sallën e dytë të panairit), si dhe në debate, tribuna, ndarje të çmimeve.
Risi, sivjet është që pjesa ekspozuese-shitëse e panairit është zgjeruar dhe në sallën e dytë do të prezantohet letërsia për fëmijë dhe të rinj dhe do të ketë kënd edukativ për fëmijë.
Prej të enjtes deri të shtunën (prej më 6 deri më 8 prill) krahas Panairit të librit do të mbahen edhe Ditët e arsimit dhe karrierës dhe Panairi për turizëm "Shkup travel market".
Për të gjitha panairet bileta hyrëse është 30 denarë, gjegjësisht 20 denarë për vizita të organizuara në grupe.