Ambasadori amerikan në Shkup, Jess Baily, ka uruar Maqedoninë për marrjen e rekomandimit pa kusht për fillimin e negociatave me Bashkimin Evropian.
Duke u përgjigjur në pyetjet e gazetarëve në Panairin për Arsim të Universiteteve të SHBA-së, Baily tha se Shtetet e Bashkuara do të vazhdojnë të përkrahin Maqedoninë në procesin e realizimit të reformave.
“Ju uroj për marrjen e rekomandimit të pastër për fillimin e bisedimeve. Së bashku me Bashkimin Evropian vazhdojmë të bashkëpunojmë bashkërisht në zbatimin e reformave, posaçërisht në sferën e drejtësisë, mediat dhe administratën publike. Pra po punojmë bashkërisht për të ardhmen evropiane të Maqedonisë”, deklaroi Baily.
Ai kujtoi edhe deklaratën e përfaqësueses së lartë të BE-së, Federica Mogherini në Kuvend, se kjo do të jetë një rrugë e gjatë dhe e vështirë dhe për këtë shkak është e nevojshme që të gjitha palët të jenë të bashkuar dhe të fokusuar.
