Kryetari i Këshillit të Evropës, Donald Tusk më 27 prill do të vjen në Shkup. Kjo u bë e ditur nga kabineti i tij duke vërtetuar informatën se Tusk do të marrë pjesë në Samitin Bërdo – Brion në kuadër të turnesë ballkanike që do të zhvillohet prej 24 deri më 27 prill, njofton Portalb.mk.
Tusk do të takohet me kryeministrin dhe kryetarin e Maqedonisë, Zoran Zaev dhe Gjorge Ivanov.
Samiti Bërdo – Brion do t’i bashkojë liderët e Ballkanit Perëndimor dhe ata të Sllovenisë dhe Kroacisë me qëllim që të thellohet dialogu politik dhe të rritet niveli i besimit për zgjidhjen e problemeve bilaterale dhe rajonale. Krahas kësaj, në këtë Samit do të diskutohet edhe për Samitin e Ballkanit Perëndimor që do të mbahet më 17 maj në Sofje.
Gjatë turneut ballkanik, Tusk do të vizitojë: Shqipërinë, Malin e Zi, Serbinë, Bosnje e Hercegovinën, Kosovën dhe Maqedoninë .
Vizita e tij do të nisë në Shqipëri më 24 prill, nga ku do të vazhdojë në Mal të Zi, Serbi, Kosovë, Bosnje dhe Hercegovinë dhe Maqedoni në Samitin e Bërdo – Brion më 27 prill.
Duke folur në Parlamentin Evropian në Strasburg, Tusk tha se do t’i përçojë mesazhin rajonit se BE-ja do të vazhdojë të jetë partneri më i besueshëm dhe investitori më i madh.
“Samiti (për Ballkanin Perëndimor në Sofje) duhet të konfirmojë perspektivën evropiane të rajonit dhe, çfarë është më e rëndësishme, duhet t’i përmirësojë lidhjet me rajonin dhe brenda tij”, tha Tusk.
Samiti në Sofje, i paralajmëruar të mbahet më 17 maj, do të jetë takimi i parë i nivelit të lartë midis BE-së dhe Ballkanit Perëndimor pas 15 vjetësh.