Qeveria e Republikës së Kosovës gjatë ditës së djeshme solli vendim që të vendos dogana për 30 për qind të prodhimeve bujqësore që importohen në Kosovë. Kjo masë e cila pritet të hyjë në fuqi të premten, do të zgjasë 90 ditë.
Për këtë çështje ministri i Ekonomisë në Maqedoni, Kreshnik Bekteshi, sot ka realizuar takim me ministrin e Kosovës për Zhvillim Rajonal, Rasim Demiri. Pas takimit Bekteshi tha se vendosja e doganave për importimin e prodhimeve bujqësore në Kosovë, nuk do të thotë luftë tregtare me mes Maqedonisë dhe Kosovës.
“Masa nuk është bërë kundër Maqedonisë dhe të përfshira janë gjitha shtetet në botë që importojnë prodhime bujqësore në Kosovë. Duke pasur parasysh marrëveshjet ndërkombëtare, kemi obligim edhe ne të ndërmarrim masat tona. Ato do të analizohen në bashkëpunim me Ministrinë e Bujqësisë dhe Drejtorinë e Doganave, por në të njëjtën kohë do të rishikojmë në kuadrin e Sekretariatit të CEFTA-s dhe shteteve tjera anëtare”, tha Bekteshi pas takimit.
Ai tha se Maqedonia nuk ka qenë e informuar në kohë për vendosjen e masave dhe shtoi se në pajtim me marrëveshjen me CEFTA, Kosova është dashur në kohë të informojë gjitha anëtaret për vendosjen e doganave.
Ndërsa ministri i Kosovës për Zhvillim Rajonal, Rasim Demiri, tha se masa është vendosur me qëllim qët të mbrohen prodhuesit bujqësor në Kosovë.
