Dy ditë pas mbajtjes së takimit të tretë të liderëve, grupet e punës së partive parlamentare akoma nuk i kanë larguar mospajtimet e tyre që u paraqitën pas pranimit të marrëveshjes mes liderëve.
Përfaqësuesit e pushtetit dje thanë se nuk do të pranojnë asnjë ultimatum nga opozita, e cila vazhdon të theksojë se është e vetmja që kujdeset për interesat kombëtare të shtetit.
Koordinatorët e grupeve parlamentare për AIM thanë se dje është arritur pajtim për Ligjin për Qeverinë në pjesën e qeverisë teknike dhe se për të ka nënshkrime nga gjithë grupet e deputetëve, përfshirë edhe të OBRM-PDUKM-së.
Sipas burimeve nga partia maqedonase qeverisëse, problem mbetet kur do të zbatohet marrëveshja për financimin e partive politike dhe ndryshimet që ka kërkuar opozita në nenin 165 në Kodin Penal.
Megjithatë grupet e deputetëve janë optimiste se do të arrihet marrëveshje dhe deri të shtunën mund të votohet marrëveshja e liderëve, përfshirë edhe zgjedhjen e anëtarëve të KSHZ-së.
