Deputeti i BDI-së Artan Grubi, sot në konferencë për shtyp tha se BDI dhe funksionarët e tyre nuk kanë pasur lidhje me arratisjen e Gruevskit në Hungari.
Ai këto pohime i quajti shpifje dhe tha se dikush duhet të mbajë përgjegjësi për ikjen e ish-kryeministrit.
“BDI dhe asnjë funksionar i saj nuk ka lidhje me procesin gjyqësor ndaj Gruevskit dhe aq më pak lidhje me ikjen e tij në Hungari. Pohimet se kemi lidhje me arratisjen e Gruevskit janë shpifje të rënda, që dalin nga një mendje e sëmurë”, tha mes tjerash Grubi.
Në lidhje me informacionet e djeshme të cilat u publikuan në Gjykatën Penale në seancën për ngjarjet e 27 prillit, se një person nga BDI ka informuar Gruevskin për zgjedhjen e Talat Xhaferit për kryetar Kuvendi, ai tha se ai nuk beson se ai person mund të jetë deputet dhe shtoi se informacionin se Talat Xhaferi do të zgjedhjet kryetar e ka njoftuar edhe kryeministri Zoran Zaev në konferencë.
Ndërsa sa i përket procesit të regjistrimit të popullsisë, ai tha se ai është edhe politik dhe kërkoi që të reformohet Enti Shtetëror për Statistika, ndërsa më pas të ketë regjistrim të popullsisë.
