Penélope Cruz thotë se dy fëmijët e saj nuk kanë telefona apo profile në media sociale.
Në një intervistë me Elle, aktorja u shpreh se si është të jesh nënë e dy adoleshentëve – një vajze 10-vjeçare, Luna, dhe një djali 12-vjeçar, Leo.
Cruz thotë se përpiqet të mbrojë fëmijët e saj – të cilët i ndan me bashkëshortin, aktorin spanjoll Javier Bardem – nga rreziqet e teknologjisë, duke pranuar se ata nuk janë në mediat sociale dhe “nuk kanë as telefona”.
“Është kaq e lehtë të manipulohesh, veçanërisht nëse ke një tru që ende po formohet”, tha Cruz për Elle. "Dhe kush e paguan çmimin? Jo ne, jo brezi ynë, që ndoshta në moshën 25-vjeçare mësuam se si funksiononte një BlackBerry. Është një eksperiment mizor mbi fëmijët, mbi adoleshentët."
Aktorja 49-vjeçare është gjithashtu shumë e kujdesshme për të mbrojtur privatësinë e fëmijëve të saj. Nëse ata duan një karrierë në qendër të vëmendjes, do të jetë sipas vendimit të tyre, tha Cruz.
"U takon atyre të vendosin nëse do të kenë një punë që është më e ekspozuar ndaj publikut apo jo. Ata mund të flasin për këtë kur të jenë gati."
Kjo nuk është hera e parë që Cruz flet për mbrojtjen e fëmijëve të saj nga rreziqet e të qenit në internet.
Në një intervistë në CBS Sunday Morning në 2021, aktorja ndau se ajo është "shumë e ashpër me teknologjinë" kur bëhet fjalë për fëmijët e saj.
“Nuk ka asnjë mbrojtje për ta, për trurin që është ende në zhvillim dhe se si kjo ndikon në mënyrën se si ata e shohin veten, janë kaq shumë gjëra që nuk janë si fëmijëria që kemi pasur”, tha Cruz.
"Nuk ka media sociale deri në të paktën 16 vjeç. Unë me të vërtetë e shoh këtë si mbrojtje të shëndetit mendor."
