Aktori dhe regjisori, i njohur për disa filma të famshëm në industrinë e „Hollywood“, Louis Mandylor ka arritur në Prishtinë.
Vizita e Mandylor në Prishtinë ndërlidhet me planet për bërjen e një filmi që për temë ka luftën në Kosovë.
Media ka siguruar pamje të aktorit dhe regjisorit të njohur i cili tashmë ndodhet në Prishtinë bashkë me ekipin e tij dhe producentin ekzekutiv.
Në ora 11:00 Mandylor pritet të mbajë një konferencë për media ku do të prezantojë projektin e tij për një film që për temë ka luftën në Kosovë.
Pjesë e kastit të filmit, përflitet të jetë edhe aktori i njohur britanik për rolin ikonik të Boyka’s, Scott Adkins.
Për Mandylor, ky nuk do të jetë filmi i parë i tij me histori shqiptare. Australiani në vitin 2019 luajti në filmin „The Brave“, që në qendër të tij kishte Lazaratin.
Krahas tij, në këtë film „hollywood’ian“ për bandat e drogës në Shqipëri, luajtën edhe disa aktorë shqiptarë. Veçse për dallim nga „The Brave“ ku Louis Mandylor u paraqit si aktor me rol kryesor, në filmin për luftën në Kosovë ylli i Hollywood’it do ta marrë përsipër regjinë e tij.
Buxheti për realizimin e këtij filmi parashihet të jetë milionësh.
